Calabas/Kudawecha – Diasabra ultimo, esta 8 di juli, un ola gigantesco a pasa laba un grupo di hungado di domino lastra te pega nan otro banda di caminda bou dje palo di kwihi grandi cu tin panort di e unico y mundialmente famoso Domino Square Garden aya na Calabas / Kudawecha. Algun di esnan cu a sobrevivi e ‘wave’ enorme aki, a keda gago y suf declarando cu nan no sa mes con nan a yega eybou. Asina vap-vap cos a sosode! Un acto contra derecho humano di tur hungado di domino a sosode ora e feroz ekipo di Team Tsunami, bou liderazgo dje dinamico Sunny, a lastra e ekipo di Bou Palo Boys c’un forsa nunca bisto ni den e pesadiyanan mas mahos c’un hungado di domino por tin.

Ora nos analisa e potret di Bou Palo Boys, nos por ripara algun cu ta hari comosifuera nan a caba di gana e premio gordo; esaki ta esnan cu djaki por bay stret Hollywood y bira actor di cine. Pero esnan cu sa miho, por ripara cu tin di nan cu cara di manera a caba di manda un boshi lamunchi zuur abou. Nan ‘acting skills’ ta ‘below par’. No por tuma nan na malo tampoco pasobra locual nan team a caba di logra un ta cos di canta macamba tampoco! Drenta halftime cu score di 11-1 contra bo, no ta echt habri perspectiva colo di rosa, y pa ora e score a bira 20-4 contra, por imagina cu tur a wak e spada di Damoclescaba ta colga ariba nan cabes! E pregunta logico ta, con por ta cu trabuconan bakia den domino por a haya un sota asina? Un bista riba e potret di Team Tsunami ta aclaria tur cos … ken por tin chens contra burdugunan dje indole manera Indio Kelkboom, Dr. Jeff, Sunny, “The Professor”, Roy, y varios otro militando e anochi ey den Team Tsunami? Shonnan, Bou Palo Boys a hura cu nan lo bin bek! Djis duna nan poco tempo pa nan bay cas laba tur e yerba di caña foi nan curpa. Keda pendiente, pasobra tin un sed grandi pa revancha ta wandro rond!