ORANJESTAD: Recientemente, un grupo di mayor a acerca Minister di Enseñansa y Deporte Endy Croes pa dialoga tocante un plan nobo. Ta trata di un grupo di mayor cu a bin cu un plan pa lanta un scol specialmente pa hoben di 16 aña bay ariba cu tin cierto limitacion. Pa asina siña diferente aspecto cu por yuda nan ta mas independiente den bida, por ehempel, siña conta, siña lesa holoshi, traha cu ATM machine. Minister Endy Croes a indica cu actualmente tin unorganisacion solamente cu ta atende cu e grupo aki na Aruba, cual ta Fundacion Muchila Creativo. Banda di esaki, e mayornan ta desea di lanta nan propio scol, mirando cu actualmente no tin un scol specificamente pa e grupo aki. Sra. Anne-Marie Proveyer di Departamento di Enseñansa (DEA) tambe tabata presente durante e reunion y a splica e proceso cu mester cumpli a traves di ley pa haya un conseho positivo di Gobierno di Aruba. Minister Endy Croes a expresa cu e hobennan aki ta un grupo cu ta touch nos curason hopi di cerca y ta un grupo cu ta rekeri di hopi atencion. Finalmente, Minister Endy Croes a enfatisa cu ta keda guia nan den e proceso pa por ta prepara debidamente. Ta keda den contacto estrecho cu DEA pa un conseho final, pa asina Minister di Enseñansa por evalua den ki forma por aporta den e plan di e grupo di mayor aki.