Na november 2022 WEB a inicia desmantelacion di tanki di awa di Alto Vista. E proyecto di Tanki Alto Vista ta forma parti di WEB su proyecto ‘Upgrade Aruba Water Distribution Network’ – un proyecto grandi cu ta encera renobacion di tankinan, pomp y tuberia rond nos isla, pero tambe den planta di WEB.
E desmantelacion tawata exitoso y a sigui cu preparacion di construccion di e tanki nobo. E trabou ta encera cobamento di e tereno y prepara esaki pa pone fundeshi di e tanki nobo. Actualmente, ekiponan ta preparando e tereno cu cement pa asina sigui pa e siguiente fase. E trabou di preparacion di e fundeshi ta andando y ta proyecta pa e proyecto completo keda cla na augustus 2024.
Cu e ausencia di e tanki di Alto Vista, clientenan den vesindario por nota variacion den e presion di awa. E tanki nobo lo tin un capacidad di 18800 m3 (6500 m3 mas cu esun bieu) y lo garantisa un suministro regular di awa pa e demanda creciendo den e area di Noord.
Habitantenan den vesindario lo por sigui nota trafico di ekipo pisa den e area y e posibilidad di disturbio di ruido. Di antemano WEB ta pidi disculpa y ta spera di por conta cu comprension di habitantenan.
En caso di pregunta of cu ta nota algo straño den e area, por tuma contacto cu WEB su Call Center na 280-4600, of por manda un WhatsApp, pa WEB Aruba Chat na 525-4600.
