ORANJESTAD: Sra. Clementia Eugene ta Interim Program Manager di Departamento di Trabou y Desaroyo Social (Department of Social Work and Development) na Universidad di Aruba. 15 di mei ultimo, Dia Internacional di Famia, Sra. Eugene a presenta na Minister di Enseñansa y Deporte Sr. Endy Croes, Minister di Asunto Social y Husticia Sr. Rocco Tjon y directora di Departamento di Asunto Social Sra. Rosanna van Dijk e resultadonan di su investigacion titula: Child Maltreatment Prevalence Rate in Aruba.

Sra. Eugene a informa cu e resultadonan di e estudio ta revela un promedio di abuso a lo largo di bida di 78.4%. Esaki ta nifica cu 8 di cada 10 mucha na Aruba ta experiencia abuso den nan bida. Tambe, e resultado a indica cu mas mucha muhe ta experiencia abuso cu mucha homber. Durante e presentacion, Sra. Eugene a duna Gobierno di Aruba diferente recomendacion cu por aplica pa garantisa proteccion, sobrevivencia, evolucion di capacidad humano y florecemento di mucha. Un di e recomendacionnan cu a duna ta pa tin trahado social na tur scol di Aruba, cuminsando den scol preparatorio. A recomenda pa incorpora Codigo di Proteccion y Señal di Siguridad na Instituto Pedagogico Arubano (IPA), den Programa di Trabou Social (Social Work Programs) na EPI y Universidad di Aruba. Minister Endy Croes ta felicita Sra. Eugene cu e investigacion amplio cu el a haci encuanto abuso di mucha. Esaki sigur lo contribui na e maneho y lo yuda Gobierno di Aruba momento cu mester tuma decisionnan esencial.