Husticia ta y lo keda un punto importante durante reunionnan interparlamentario. Aruba, den nomber di sr. Tjon, ta presidi e grupo di trabou interparlamentario, cu ta enfoca entre otro riba Husticia. E biaha aki a palabra concreto cu lo urgi na e respectivo Gobiernonan pa instala un comision cu representacion di tur isla pa yega na solucionnan duradero y comun pa e circumstancianan di detencion den Reino.
NORMANAN INTERNACIONAL
Manera ta conoci Aruba como pais, pero tambe tur e otro paisnan den Reino, mester cumpli cu normanan internacional, pa loke ta procesonan pa procesa peticionnan di asilo, pero tambe circumstancianan bou cual e personanan, cu ta en espera di un contesta, ta wordo ubica. Pero mas aun tambe a pidi atencion pa circumstancianan na e respectivo prisonnan di Aruba, Corsow y Sint Maarten. Ta importante pa yega na un plan comun pa e paisnan den Reino door cu tur ta mara na e mesun normanan internacional.
PLAN COMUN
E plan comun cu e grupo di trabou traha lo mester presenta alternativanan concreto. Akinan por pensa riba alternativanan pa detencion, manera observacion electronico (cual lo baha gasto), y percura pa resocialisacion ta mas efectivo. Pero tambe mester pensa riba intercambio di conocimento riba tur tereno pa loke ta e aspectonan cu cada pais ta wordo “geaudit” riba dje.
IPKO
Durante e reunionnan di e grupo di trabou a trece pa dilanti cu tur pais ta señala e necesidad pa traha mas hunto riba e topico aki. Esey ta e motibo cu un peticion ta bay pa e Ministernan di Husticia di cada pais den Reino, cual por cierto ta reuni e siman aki na Corsow, pa instala e “task-force’ y bin cu solucionnan concreto na beneficio di Reino.
PA CONCLUI
Importante pa señala cu diferente aspecto pa yega na mehoracion di KIA tin su atencion, pero ta importante pa sigui enfoca riba esaki. Ya caba tawatin combersacion riba e punto aki cu Minister di Husticia y ela duna di conoce di ta wak esaki como algo positivo tambe. E peticion di parti e plataforma di IPKO ta pa prome cu fin di 2020 yega na un reportahe extenso, con cohuntamente lo yega na solucionnan duradero y presenta esaki na Parlamento.
