ORANJESTAD: Diasabra anochi, den e ballroom di Hyatt Place Aruba Airport a tuma luga un bunita ceremonia di clausura di Weganan Interinsular 2023. E scolnan di Aruba, Boneiro y Curaçao ta satisfecho y orguyoso cu e Weganan Interinsular a reinicia bek despues di 7 aña. Durante e anochi,mandatarionan di Aruba, Boneiro y Curaçao a elogia e curashiy iniciativa cu a tuma pa reanuda e hermandad deportivo escolar entre nos muchanan di scol. Hunto por logra cosnan grandi den tur area y deporte sigur deporte ta un di nan.
Despues a sigui pa entregamento di trofeo na e scol ganado di Weganan Interinsular 2023, cual ta Colegio Sagrado Curason. Maria School a ricibi su trofeo di subcampeon di e campeonato escolar. Na di tres (3) luga a keda Sint Joris School di Curaçao y na di cuater (4) luga Colegio Rayo di Solo di Boneiro. Tabatin un premio special den e disciplina di volleyball, esta e “Most Valuable Player” (MVP), e hungado mas valioso, esaki a bay pa Brandon de Leca. Brandon durante e dos dianan di competencia a sa di demostra su habilidadnan den e deporte volleyball, cual tabata e empuhe grandi cu su ekipo di Colegio Sagrado Curason tin un titulo mas di campeon volleyball, e biaha aki campeon di Wegana Interinsular 2023.
A haci entrega di trofeo na Colegio Arubano cu a titula campeon den futbol mucha muhe di Weganan Interinsular2023. Colegio Nigel Matthew a keda como subcampeon. Na di tres (3) luga a keda Scholengemeenschap Bonaire y di cuater (4) luga M.M. Römmerschool di Curaçao. Den e disciplina di futbol tambe a scoge un “Most Valuable Player”(MVP) cu a bay pa Loredana Nepi cu a hunga tur e weganan di competencia y tabata un piesa clave pa e ekipo di Colegio Arubano cu a titula campeon di futbol di Weganan Interinsular 2023. Loredana tambe ta forma parti di e seleccion Arubano di futbol U-14.
Minister Endy Croes a gradici Minister di Enseñansa, Ciencia, Cultura y Deporte di Curaçao, Sr. Sithree van Heydoorn, Diputado di Infrastructura y Deporte di Boneiro, Sr. James Kroon pa nan dedicacion y esfuerso pa rebiba Weganan Interinsular. Den nomber di Gobierno di Aruba, Minister Endy Croes a haci entrega di un reconocemento na ambos mandatario. Minister di Deporte a gradici IBISA di Aruba, INDEBON di Boneiro y FFDK di Curaçao cu a prepara e Weganan Interinsular den seis diferente disciplina. Tambe, Minister Endy Croes ta gradici tur alumno, docente, coach, mayor y tur cu a haci Weganan Interinsular 2023 posibel yuno sumamente exitoso.
Finalmente, a clausura Weganan Interinsular cu un show carnavalesco di grupo di baile Mini y Baby NTG bou guia di Sra. Marisol Peña y riba ritmo di TBS Brassband pa deleita nos bishitantenan cu nos celebracion cultural mas grandi.
