Secretario General di MEP ta recorda pueblo e engañonan di AVP. Na aña 2009 Mike Eman y AVP a core campaña y a gana eleccion cu nan promesa cu nan lo elimina BBO. Nos tur ta corda con AVP a crea e persepcion den pueblo cu BBO ta e monster cu a mata Aruba. Hasta a convence e ciudadanonan inocente pa graba spot na television cu momento bo habri cranchi di awa, BBO ta cuminsa core. Mientras realidad ta otro paso no tin BBO riba awa. Asina leu Mike a bay pa manipula pueblo pa gana eleccion pa drenta gobierno.

AVP a logra cu su engaño y manipulacion:

September 2009 AVP a gana eleccion abrumador cu 12 asiento momento cu a logra convence pueblo cu BBO ta un monster y AVP lo “ELIMINA” BBO y asina tur prijs lo wordo reduci pa comunidad. Esaki a resulta di ta un mentira flagrante. Henter mundo riba conseho di IMF tabata haci e “shift” di impuesto directo pa impuesto indirecto y asina tur pero tur hende ta contribui den caha di gobierno na un manera husto. Mike Eman pa purba cumpli cu su engaño, a reduci e BBO di 3% pa 1.5%. Aruba mesora a cuminsa bay den “rood” y a cuminsa presta miyones. Mike Eman y AVP durante nan gobernacion no por a wanta e precion di nan engaño y a dicidi pa aumenta e BBO bek. Na september 2017 pueblo a fada di manipulacionnan di Mike Eman y AVP y a scop AVP malamente for di gobierno mandando un señal bon cla. E momento aki Mike Eman y AVP a laga e BBO na 3.5% y mas halto cu AVP a ricibi BBO na 2009 tabata 3%. Realidad “sunu” ta cu Mike Eman y AVP a manipula un pueblo uzando strategia di diablo pa crea un persepcion robes. A gana eleccion cu nan campaña di ELIMINA BBO, pero realidad ta lo contrario. Mike Eman a aumenta e BBO den su periodo. Prohibi pa lubida!

AVP a masacra Aruba y a crea un Mega Debe:

Den tur rapport di Banco Central por tuma nota con AVP a presta miyones den aña di bonansa y masacra Aruba financieramente creando e Mega Debe. Mike Eman a presta un total di 2200 mil miyon florin (2.2 biyon) durante aña 2010-2017 pa cera su presupuestonan durante 8 aña. (lesa rapport Banco Central di Aruba y di Departamento di Finansas). Aruba ta pagando 260 miyon florin pa aña solamente na interes cual ta igual na 700 mil florin pa cada dia 365 dia pa aña.  Pueblo ta kere esaki ta husto? Pueblo por compronde cuanto scol nos por a drecha y traha cu e placa aki, cuanto cancha deportivo y cuanto caretera di asfalt nos por a construi cu e placa aki? 260 miyon solamente na interes riba placa cu Mike Eman y AVP a presta. Foei Mike y AVP. Esaki tabata e maneho di Mike Eman y AVP. Pero Mike Eman y AVP ta hopi conoci y popular pa nan maneho desastroso. Mike Eman a manda Aloe Balm, EMCO, Interbank y Canal 15 ATV failliet. Tur ta negoshi di famia Eman. Esey tabata su maneho. Finalmente el a desgracia finansas di pais Aruba, creando un Mega Debe poniendo Aruba na rand di bancarota. AVP nunca pero nunca mas. Prohibi pa lubida!