Durante reunionnan cu a tuma luga como parti di ANATO, na Bogota a logra finalisa acuerdo entre A.T.A., AAA y Wingo, pa un ruta nobo entre Cali y Aruba cu lo cuminsa opera desde dia 1 di juli, 2023, riba diaranson y diasabra.
Presente na e reunion di parti di Aruba tawata tey Ronella Croes, CEO di A.T.A., Sanju Luidens CMO di A.T.A., Jordan Schlipken, Director di A.T.A. na Latino America y Jo-Anne Meaux-Arends, Aviation Business Development Executive di AAA. E ekipo di Wingo na e reunion a consisti di Andrés Camilo Franco, Gerente di Comunicacion, Simón Maya Gerente di Mercadeo, Olga Trujillo, Gerente Comercial di Mayorista, Fernando León, Director di Planeacion di Red y Marcela Chaves, Lider di Marca.
“E inaguracion di e ruta nobo aki di Wingo ta yena nos cu entusiasmo. Colombia ta un di e mercadonan mas importante cu Aruba tin y pa e motibo aki nos tin como meta pa sigui conkista turistanan proviniente di e pais ey. Pa 2023, nos tin un meta di mas di 37mil pasajero for di Colombia. Hunto cu nos socionan local y den e mercado nos ta traha tur dia pa duna bishitantenan alternativanan nobo pa yega nos isla. Nos ta contento di por a logra e ruta aki y ta invita bishitantenan di e area di Cali pa bishita nos tambe”, segun Ronella Croes.
Jo-Anne Meaux Arends, a comenta cu: “Nos socionan di Wingo lo pone un avion di 186 asiento disponible pa cada parti di e trayecto Cali- Aruba-Cali. Esaki ta demostra con atractivo Aruba ta pa sigui fortalece conectividad aereo cu e region Latino Americano, specialmente cu Colombia”.
Segun Jordan Schlipken: “Latino America ta sigui crece y nos ta rumbo pa e recuperacion completo, ehecutando plannan di accion cu por permiti nos conecta mas ciudad den nos mercado principal. E idea ta pa sigui traha pa incrementa frecuencia aereo a traves di nos socionan. Sin duda e ruta nobo aki lo impulsanos obhetivonan di desaroyo y crecemento di bishitante for di e region”.
E ruta nobo aki ta crea oportunidadnan nobo pa bishita pa nos mesun hendenan na Aruba tambe, pues tin beneficio adicional. A.T.A. y AAA ta agradecido cu por a yega na un acuerdo cu Wingo y cu Wingo ta wak e potencial den nos isla. Hunto lo sigui traha pa busca oportunidadnan pa bishitantenan por yega Aruba di un forma mas facil y directo.
