Secretario General di MEP a tuma nota cu Parlamentario Gerlien Croes a bisti e sapatonan bieu di Mike Eman y a cuminsa cu e politica di lansa mentira tras di mentira. Nos por corda e politica di Mike Eman, cual ta compara cu Profeta Hananias. Profeta Hananias ta un profeta falso cu tabata gaña y indoctrina su pueblo cu mentira flagrante. Nos a tuma nota cu Gerlien Croes a tuma e corona over di Mike Eman y ta profila su mes awo como La Reina del Sur cu masha hopi mentira. Ta nos deber pa desmantela La Reina del Sur Gerlien Croes su mentiranan.

La Reina del Sur Gerlien Croes cu 12 mentira den un (1) solo comunicado:

La Reina del Sur ta un serie, unda e personahe principal ta un señora di baho mundo. Nos por a tuma nota di e atakenan di Gerlien Croes y AVP riba Eddie Briesen. Nos ta compronde cu den politica bo mester tin lomba hancho. Pero, na momento cu un politico hoben kier bisti e sapatonan bieu di Mike Eman y Henny Eman pa profila y lastra hende cu mentira, manera AVP semper a haci, ta na su luga pa nos responde cu berdad pa kibra e mentiranan di La Reina del Sur. Cu Eddie Briesen tin dos (2) contract (DVO) tanto cu Minister di Energia y Minister di Enseñansa ta un engaño. Esaki ta mentira di la Reina del Sur Gerlien! Eddie Briesen tin un contract (DVO) cu un minister, esta Minister di Enseñansa y ta eherciendo e funcion di consehero, 4 ora pa dia. Cu ta paga Eddie Briesen separa di e dos (2) DVO contractnan cu Eddie tin, esaki ta mentira di La Reina del Sur Gerlien. Eddie tin solamente un (1) DVO y no dos (2). Den otro compania y fundacion ta varia tambe entre 2 pa 3 mil pa luna. Otro mentira di La Reina del Sur Gerlien. Tempo Eddie tabata den directiva di Futura (cual Eddie no ta mas) esaki tabata “ONBEZOLDIGD” ,pues sin compensacion. Cu Eddie lo tin un contract gordo na Santa Rosa, esaki tame ta mentira di La Reina del Sur Gerlien. Eddie no tin ningun contract na Santa Rosa y ta reta Gerlien pa bin cu prueba. Segun La Reina del Sur, dia 12 di juli 2022 Eddie Briesen a hit e jackpot, paso Eddie a haya un aumento di 9 mil, paso a hinc’e den 3 directiva. Mentira di La Reina del Sur y kisas e mester ta riba algo straño. Segun Gerlien cu nombramento di e miembronan di directiva ta pasa den Ministerraad. Mentira di La Reina del Sur. Kisas e ta hoben y no sa of ni ta compronde tur proceso ainda. Nombramento di hunta di directiva di RDA NO ta pasa den Conseho di Minister. Cu Prome Minister kier laba man pa e posicion di Eddie Briesen den FUTURA ta otro Mentira di Gerlien, La Reina del Sur ta wordo desbarata. Desde e luna di october di aña 2022, Eddie Briesen no tin dicho funcion cu tabata un funcion sin pago. Segun Gerlien cu banda cu Eddie Briesen tabata consehero di dos (2) minister a dun’e un aumento di 9 mil florin. Mentira flagrante di La Reina del Sur Gerlien Croes. Eddie ta consehero di un (1) minister, ta traha 4 ora pa dia y nunca a ricibi un aumento di 9 mil florin. Actuacion di Gerlien Croes ta comparabel cu La Reina del Sur, un señora den baho mundo y Gerlien ta compronde e idioma aki bon bon. Puntr’e dicon e no por drenta Merca! No trata di uza strategia kima di AVP, esta pa lastra hende drechi y kere cu haciendo esey bo ta score. Desde Henny Eman, AVP a uza e strategia aki contra Betico y Nel. Nos por corda con Henny tabata gaña cu Betico a cumpra fabrica di chuculati pa 300 miyon na Venezuela, algo cu nunca hamas tabata berdad. E mesun tono aki Gerlien La Reina del Sur cu ta entrena pa Henny Eman, kier uza awe contra Eddie Briesen. E fli aki no lo subi y nos lo t’ey pa desenmascara bo mesun dia y mesun momento. Kisas por conta pueblo dicon La Reina del Sur Gerlien Croes no por drenta Merca (USA). Nos ta keda en espera di e contesta!