ORANJESTAD, Diaranson mainta, Minister di Enseñansa Endy Croes a reuni cu directiva di
Stichting Avondonderwijs Aruba (SAA), cual ta atende cu Avondmavo y Avondhavo. SAA
ta huur e edifcio di Educacion Profesional Intermedio (EPI) pa Avondmavo Aruba y edificio
di Colegio Arubano pa Avondhavo Aruba. Tanto Avondmavo como Avondhavo tin alrededor
di 400 alumno. Durante e reunion SAA a trece diferente peticion dilanti, entre otro, e
necesidad grandi cu tin di trahado social (sociaal maatschappelijk werker) y ortopedagogo na
Avondmavo y Avondhavo.
Banda di esaki, a dialoga tocante e cantidad di alumno cu mester tin segun ley pa habri un
klas. Ta pidi cooperacion pa habri klasnan mas chikito, mirando cu scol anochi ta diferente cu
scol den dia. Muchanan cu a laga scol den dia, ta traha den dia y ta bay scol anochi. SAA lo
bin cu un data pa trata e topico aki pa yega na cualkier compromiso pa scol anochi. Un otro
tema cu a trata ta docente di tempo completo. Awor aki SAA ta trahando cu hopi docente di
mita tempo. Pa stabilidad SAA ta desea un cantidad di docente di tempo completo. SAA ta
trahando riba un plan cu pronto lo wordo presenta y trata.
Tambe, SAA a trece dilanti cu actualmente nan ta haciendo un acuerdo cu Stichting
Voortgezet Onderwijs Aruba (SVOA), pa haya un pida tereno extra pa traha algun lokaal mas
pa Avondhavo. Minister Endy Croes ta habri pa scucha peticion di tur stichting y hunto yega
na un acuerdo cu ta beneficioso pa enseñansa di Aruba den su totalidad.