WILLEMSTAD, Segun sifras nan di VIC di 2017, nos tin 9% di nos poblashon ku un desabilidat fisiko pero tin hopi tipo di desabilidat mas i asta desabilidat ku no ta visibel. Esei kiermen ku tin mas tantu hende ku un desabilidat den nos komunidat ku nos ta na haltura di dje. Apesar di esei hopi bia ta bin dilanti ku bo no ta mira hendenan ku un desabilidat niun kaminda i ku na Kòrsou ta dediká hopi tiki atenshon na personanan ku un desabilidat.

Pesei ta importante pa marka e fecha 3 desèmber awor ku pa promé bia lo bai tin e feria di abilidat riba Brionplein. Un momentu ku personanan ku un desabilidat lo bin mustra nan abilidatnan ku asta e oportunidat ku pueblo di Kòrsou lo por kumpra kos di pasa boka, fruta i berdura di propio kosecha, mata, kos di arte i hopi mas.

Pa algun aña kaba a kuminsá e esfuerso pa uni e diferente organisashonnan ku ta traha pa personanan ku un desabilidat i alabes pone atenshon riba e fecha 3 di desèmber ku ta Dia Internashonal pa Personanan ku un Desabilidat. E fecha aki a keda deklará pa Nashonnan Uni pa enkurashá inisiativanan mundialmente ku ta sigui promové derechinan di personanan ku un desabilidat.

E aña aki ta bira e momentu ku pueblo di Kòrsou por haña chèns di bin mira di aserka e diferente personanan i tambe e diferente fundashonnan ku lo bai tei dia 3 desèmber riba Brionplein for di 2’or te 7’or pa selebrá e abilidatnan di personanan ku un desabilidat na Kòrsou.