Na luna di oktober ultimo, director interino di Museo Arqueologico Nacional di  Aruba (MANA) a organisa un tayer pa personal di e museo. E training aki a tuma luga den auditorio di MANA.

E training tabata bou di guia di Lupita Gil, ex-director di UNOCA y actual miembro di UNOCA, Ray-anne Hernandez actual director di UNOCA y Ruby Eckmeyer, kende ta e specialista pa e programa di cultura na secretariado di Comision Nacional pa UNESO di Aruba.

Meta di e training ta pa introduci varios terminologia cu ta  uza ora ta trata di un maneho di cultura y tambe pa haya informacion di e contenido di e maneho integral di cultura di Aruba y su relacion cu e metanan pa Desaroyo Sostenibel (SDG) di Nacionnan Uni.

E tabata un training interactivo, den cua e participantenan por a intercambia idea y experiencia. Reaccion di e participantenan tabata hopi positivo y nan a pidi pa den futuro continua cu mas training. Nan a trece dilanti e importancia pa intercambio di informacion y di e colaboracion di trabou cu otro profesional den e sector di cultura.

Den cuadro di e programa Culture and Arts Education di UNESCO por spera den futuro mas riba tereno di educacion cultural na Aruba den colaboracion cu e diferente instancia y organisacionnan. Pa e museonan na Aruba entre otro lo bay prepara organizacion di diferente mas training.