Minister di Finansa a presenta recientemente e Presupuesto Supletorio pa 2019 cual a wordo aproba pa Parlamento.

Aña 2018 y aña 2019 cu un presupuesto supletorio budget neutral

Esaki ta di dos biaha cu e mandatario ta presenta un Presupuesto Supletorio cu ta budget neutral, pues cu Gobierno no a gasta mas placa cu a presupuesta y cu Parlamento a aproba. Na aña 2018 Minister Xiomara a presenta e prome Presupuesto di Pais Aruba na Parlamento cu a ser aproba como budget neutral, y pa aña 2019 tambe Gobierno a demostra e mesun diciplina financiero di keda dentro di e aprobacion cu Parlamento a duna.

Di un deficit di 444 miyon di e Gobierno anterior pa un deficit di 4 miyon

Durante su presentacion e mandatario a informa Parlamento di Aruba cu lo cera aña 2019 cu un Presupuesto cu un deficit di 4 miyon florin enves di e 24,8 miyon presupuesta . E mandatario a enfatisa cu esaki ta un logro financiero grandi ya cu esaki ta refleha un maneho financiero responsabel. E dignatario a enfatisa cu na aña 2014 Pais Aruba tabatin un deficit di 444 miyon y awe 5 aña despues ta presenta un presupuesto supletorio cu un deficit di apenas 4 miyon. Na aña 2015 a premira un deficit di 168,3 miyon y despues den presupuesto supletorio esaki a bira 131,2 miyon. Na aña 2016 a premira un deficit di 103,1 miyon y despues esaki a bira 97,9 miyon. Na aña 2017 a premira un deficit di 24,6 miyon y esaki a bira 154.6 miyon. Na momento cu Gabinete Wever-Croes a drenta Gobierno a bin haya un extra deficit di 130 miyon. Na 2018 a premira un deficit di 149,9 miyon y Minister Xiomara Maduro a presenta un presupuesto supletorio sin cambio. Finalmente na aña 2019 a premira un deficit di 24,8 miyon y a logra cera aña 2019 cu un deficit di solamente 4 miyon.

Den 2019 Gobierno ta cumpli cu e norma segun e Protocol

Minister Xiomara ta subraya cu segun e norma di e Protocol firma cu Hulanda, a premira cu lo ta bay tin un deficit di 25 miyon den 2019, pero debi na diciplina financiero demostra pa Gabinete Wever-Croes a logra cera aña 2019 cu un deficit di apenas 4 miyon. Cu esaki Gobierno ta keda dentro di e normanan stipula y ta cumpli cu e Protocol sera cu Hulanda.

Rumbo pa stabilidad financiero

E mandatario a subraya cu Gabinete Wever-Croes ta trahando pa hiba Aruba den rumbo pa stabilidad financiero den cual nos lo por conoce Presupuesto cu surplus cuminsando for di aña 2020.