ORANJESTAD: Durante conferencia di prensa di Gobierno di Aruba diaranson mainta Minister Endy Croes a elabora riba su reciente biahe pa Boneiro. Na luna di maart di e aña aki a cuminsa papia di e idea hunto cu Minister di Enseñansa, Ciencia, Cultura y Deporte di Curaçao Sithree van Heydoorn y Diputado di Infrastructura y Deporte di Boneiro James Kroon. Riba e fecha special unda a conmemora 40 aña di INDEBON, Instituto di Deporte di Boneiro a firma oficialmente e acuerdo.

Weganan Interinsular ta stimula union y competencia cu sigur ta importante pa e desaroyo di nos muchanan. Nos por corda hopi aña atras con scolnan ta competi contra otro y e ganadonan ta competi contra e otro islanan. Minister di Deporte cu hopi orguyo a expresa cu Weganan Interinsular ta re-inicia na luna di maart 2023 cu un total di 6 deporte. Dianan 10, 11 y 12 di maart 2023 Weganan Interinsular ta cuminsa na Boneiro cu e prome dos disciplinanan; dammen y schaken. Di dos fecha ta 21 pa 26 di maart 2023 unda cu e Weganan Interinsular ta tuma luga na Curaçao den edisciplinanan di atletismo y trefbal. Dianan 21, 22 y 23 di april 2023 Aruba ta cede di Weganan Interinsular unda taorganisa e competencia di volleyball y futbol. Futbol ta pa scolnan secundario esaki ta un palabracion cu Johan Cruyff Foundation cu ta duna sosten y e peticion ta pa futbol femenino cu ta tuma luga na e Cruyff Court Denzel Dumfries.E mandatario di Deporte a agrega cu a manda un invitacion na Saba, Sint Maarten y Sint Eustatius pa participa den e Weganan Interinsular.

Minister Endy Croes ta gradici sr. Edgar Erasmus di IBISA cu ta e ‘trekker’ den ultimo lunanan di negociacion cu e departamentonan di deporte tanto na Curaçao como Boneiro pa nos por a yega na e acuerdo aki. Por ultimo e mandatario di Deporte a enfatisa di ta contento di por re–inicia cu Weganan Interinsular, a aloca fondonan pa por apoya nos scolnan. IBISA a ranca sali cu e competencianan na scolnan