Minister Maduro di Cultura a reuni cu sra. Marushka Tromp y sr. Peter Scholing di e Comite Nacional di UNESCO na Aruba pa haya sa mas di e preparacion cu ta tumando luga pa asina Aruba por ta anfitrion di e conferencia regional di MOWLAC na november 2022.

Desde 1992, UNESCO ta promociona y coordina e programa Memory of the World (MOW) cu ta preserva y brinda acceso na documentacion y herencia digital di relevancia grandi pa tur persona na mundo. E meta di e programa ta pa evita cu, entre otro, guera, intrankilidad social, falta di recurso, sabotage, comercio ilegal y destruccion, por causa cu documentonan historico por disparce di e memoria colectivo di humanidad. Pa e region di Latino America y Caribe e programa aki ta wordo guia pa un Comite bou e nomber di MOWLAC.

Na Aruba tambe trabounan ta wordo haci na Biblioteca Nacional Aruba y tambe na Archivo Nacional Aruba pa conserva e memoria colectivo di nos Pais. Nos por ta orguyoso di e coleccion digitalisa di Biblioteca Nacional Aruba cu recientemente danki na e contribucion valioso di Archivo Nacional Aruba y Departamento di Legislacion, ta conta tambe cu informacion digitalisa di e Historia Colonial di Aruba. Ta trabounan importante cu a wordo haci pa conserva e historia di nos Pais cu ta hala atencion positivo pa nos Pais den e programa di MOWLAC.

Minister Maduro ta gradici e Comite Nacional di Aruba pa tur e trabounan cu ta wordo haci pa asina Aruba por ta un anfitrion digno di e conferencia di MOWLAC na november proximo. Mas informacion riba MOWLAC por wordo mira via http://mowlac.org/en/about-mowlac/ . E coleccion digital di Historia Colonial di Aruba por wordo mira via https://archive.org/details/BNA-DIG-PB-1816-1851 .