Calabas/Kudawecha – Shonnan amante di adrenalina dendomino, diasabra 13 di augustus ultimo tabata un anochi di corta rosea aya n’e unico y mundialmente famoso Domino Square Garden net n’e grens entre Calabas y Kudawecha. Porfin, despues di hopi “negociacion”,  e team duro di pariba di brug, esta PARIBA LEGENDS DT, a dicidi di enfrenta e ekipo di nan padrino Nelson “Snor” Perez, esta TEAM SNOR. Un anochi cu ya ariba papel caba tabata priminti cu lo ta yen di vuurwerk!

Y t’asina mes! Manera e tiro di salida a tuma luga, Pariba Legends ta sali brabo brabo pa mustra cu aki no tin miedo di “the godfather” Snor. Den un rato di ora, score ta 4 -1 na fabor di Legends. Cos no ta mustra di ta bay ta canta macamba tampoco pa Snor ora cu segun nochi ta progresa, Pariba Legends ta amplia e bentaha na 8-3! Snor, kende a planea pa tene su celebracion di su cumplimento di 60 aña eynan e anochi ey, ya a cuminsa grawata bigoti y pensa ta con e ta haci pa cancela e bolo. Manera un locomotief, Pariba Legends ta sigui score nonstop y ta cera halftime c’un bentaha di 11-7. Algo cu Snor kisas toch por ta por biba cu ne y adapta su strategia.

Snack y pasapalo ta skeiro rond na ordo, y den background Captain Magda ta cuminsa prepara pa “takeover” y laga su magia haci su trabou. Di dos tempo ta bay aden, y Pariba Legends ta sinti cu aki biento a bolter di direccion! Den un fuerte bataya, pocopoco Team Snor ta coy speed y ta empata Pariba Legends sensacionalmente na 14-14! Manera un dirigente di orkesta, Captain Magdata schuif y aregla su hungadonan manera e ta haya ta bon, y Team Snor ta pika dilanti cu 16-14! Pariba Legendsta manda Nitro den motor estilo Fast & Furious, ta empata e wega sensacionalmente na 16-16, y sin wak atras ta tuma un bentaha di 19-16! Adrenalina ta “sky-high” den Domino Square Garden! Pero, careda di bina no a caba ainda y “from behind”, kaki-kaki estilo careda di burico, Captain Magda ta orkestra su hungadonan di tal manera cu nan ta suta wega tras di wega pa sensacionalmentegana cu score di 21-19! Fiesta di Snor ta “barst uit” den tur su furia y alegria, y ata, “Snor” Perez ta haya un bolo di chuculati patapata den su cara, lagando e tur zonza! Mientras cu celebracion ta den full swing, via un entrevista exclusivo, un dje capitannan di Pariba Legends ta declara cu ora nan a yega e score di 19, nan a dicidi di tene duele cu pober Snor ya cu e ta haci aña y nan a laga e liña bay y “get Snor off the hook”! Wel, wel, wel, shonnan, ken y kico pa kere awo? Den e “magia” di Captain Magda, of den e bon curason Samaritano di Pariba Legends? E cos aki ta hole un “wordt vervolgd”! Keda pendiente…