Ta trata di entrada destina pa ATA, TPEF, AZV, SVB, DIMAS y DIP
ORANJESTAD – Departamento di Impuesto ta un departamento di gobierno cu tin e tarea pa garantisa entrada di impuesto y pa facilita e contribuyente pa por cumpli cu su debernan fiscal. E ta un tarea cu un responsabilidad grandi pa cu presupuesto di Pais Aruba y e presupuestonan di otro instancianan di gobierno manera ATA, TPEF, AZV, SVB, DIMAS y DIP.
Entrada compara cu aña 2021
Den e prome mita di aña (januari te cu juni) 2022, Departamento di Impuesto a registra un total di 469 miyon florin na entrada di toeristenheffing, primanan di AOV/AWW y AZV, erfpachtscanon y entrada pa gasto di permiso di DIMAS, cualnan ta destina pa instancianan manera ATA, TPEF, SVB, AZV, DIP y DIMAS. Den e mesun periodo na aña 2021, e entrada a suma 378 miyon. Pues un aumento significativo di 24%.
Aki ta sigui un bista di e entradanan:
(A haci e sumanan cera)
| Entrada 2022 januari – juni |
Entrada 2021 januari – juni |
|
|---|---|---|
| Erfpachtsrecht | 15 miyon | 12 miyon |
| Retributies DIMAS | 0.4 miyon | 0.08 miyon |
| Leges DIMAS | 1 miyon | 0,3 miyon |
| Primanan di SVB | 159 miyon | 142 miyon |
| Primanan di AZV | 132 miyon | 118 miyon |
| BAZV | 109 miyon | 82 miyon |
| Toeristenheffing ATA | 51 miyon | 23 miyon |
| Toeristenheffing TPEF | 2 miyon | 1 miyon |
| Total | 469 miyon | 378 miyon |
Factornan cu ta hunga un rol importante
E entradanan menciona ta depende grandemente riba e desaroyo economico di Aruba. E efectonan di e recuperacion di turismo y e economia ta claramente visibel na e cifranan. Un factor importante ta tambe e trabounan cu Departamento di Impuesto ta haciendo riba tereno di compliance. Henter e staf y personal di e departamento ta haciendo nan maximo esfuerso pa facilita e contribuyentenan pa nan por cumpli cu nan debernan fiscal dunando un servicio optimal. E meta final ta pa e contribuyente ta conciente di nan responsabilidad di entrega nan declaracion fiscal y paga nan impuesto na tempo evitando asina costonan adicional di boet of interes.
Como cuidadano di Aruba nos tin e deber pa cumpli cu nos responsabilidad di declara y paga nos impuestonan na tempo cu ta na bienestar di nos mes y di nos pais. Di e forma aki otro instancianan manera SVB por cumpli cu entre otro pago di pensioen di biehes y pensioen di huerfano, AZV por sigui cubri nos gastonan medico, ATA por sigui mercadea e producto Aruba internacionalmente y TPEF por sigui engrandece/embeyece e producto Aruba localmente.
Finalmente cumpli cu impuesto ta cumpli cu bo Pais!
Gerencia di Departamento di Impuesto
12 di augustus 2022
