Partido MEP na AVP E LADRON TA PENSA CU TUR OTRO TA MESCOS CU NE

E barbaridad di mas grandi cu nos por a tende ta cu ‘Glenbert a horta den FASE.’ Un cos CU sigur ta e sumpiña den wowo den AVP ta cu MEP a demostra cabalmente: Nos no ta boso. Minister Glenbert Croes ta demostrando di ta un Minister cu t’ey y ta para pa nos pueblo ora cu nos pueblo mas mester di ayudo y oido. MEP ta demostrando con ta goberna honestamente. Glenbert Croes no ta ladron ni corupto.

AVP TA GOBERNA PA YENA SU PROPIO SACO

Un AVP cu tin ladron di tereno di pueblo como parlamentario, ladron di permiso como su ex ministro, ladron di placa di RDA como su ex ministro, ladron di placa di RDA como parlamentario, abusador di miyones como consehero… Esey ta nan. Esey ta AVP. Goberna pa yena saco propio riba custiya di pueblo.

FASE UN PROYECTO NOBLE Y DIGNO

FASE cu ta un ayudo cu a surgi den y pa necesidad di un pueblo, ta un proyecto noble y digno cu a yuda nos pueblo sobrevivi e crisis di mas grandi na mundo. E propio IMF a reconoce e balor di un reaccion rapido di parti di Gobierno cu a yuda scapa bida di hende.

AVP Y MAS A VOTA CONTRA 12.246 HENDE

Tristo ta cu awe AVP y MAS a vota contra e 12.246 hende cu FASE a yuda sobrevivi den tempo cu no tabatin nada, pero ta sali defende un grupito so den comunidad cu ta gosa di salarionan astronomico. Prueba cu AVP no ta goberna pa bo, e homber chikito, nos pueblo.

AVP A DEFENDE SALARIONAN BARBARO DI DIRECTORNAN

AVP a para defende e salarionan barbaro di 50 mil plus di directornan. AVP a bay contra pa cobra comercio cu a haya placa di mas di Loonsubsidie. AVP a para defende pecho yen un grupito, y a draai vota contra 12.246 ser humano cu a haya e asistencia di FASE.

Politica ta noble pasobra e ta duna bo e oportunidad unico di traha pa bo Pais. Un politico mester traha pa su pueblo y no pa su mesun interes, manera esunnan ya condena y ainda sospecha di corupcion den seno di AVP y MAS.

Minister Glenbert Croes y Partido MEP lo para pa y lo defende abo cu a haya FASE pasobra nos Partido a biba y convivi cu nos pueblo e momentonan dificil ora cu tur otro tabata bon cera den penthouse cu mansion.