Oranjestad – 4 di  juli 2022 – Diasabra anochi na veld di Frans Figaroa a tuma lugar e ultimo wega di e Campeonato Aruba Bank Liga Oro-Division Damas.

E final di Aruba Bank Liga Oro tawata entre dos ekipo di Britannia. Durante e final e dos ekiponan a subi veld conhuntamente cu miembronan di Arubaanse Voetbal Bond (ABV), y representante di Aruba Bank.

Miembro di directiva di AVB Mildred Wever y Roxanne Croes, Sr. Officer Marketing di Aruba Bank a hiba palabra.

Nan a gradici tur e ekiponan di RCA, Riverplate, La Fama, Estrella, Dakota y Britannia cu a forma parti di e Campeonato, mayornan y coachnan pa a kere den organisacion di e campeonato di voetbal pa damas.

Despues di un tremendo partido e ekipo di Britannia 1 a titula campeon. E hoben Tarianna Doornkamp a wordo nombra MVP di e campeonato.

Aruba Bank, e banco di deporte na Aruba, ta comprometi pa promove deporte den comunidad y ta sumamente honra di sostene hende muhernan den deporte na Aruba. For di inicio e banco pionero a kere den e campeonato di damas den futbol y ta satisfecho di mira e interes creciente den e torneo.

Masha Pabien na tur participante, na e ekipo campeon, organisadornan, mayornan y coach pa haci e Campeonato Aruba Bank Liga Oro-Division Damas un exito rotundo.