Oranjestad – 27 di juni 2022- Olympic Day Run 2022 a tuma lugar diasabra mainta na Compleho Deportivo Guillermo Prospero Trinidad y Entertainment Center.

Instituto Biba Saludabel y Activo (IBiSA), COA conhuntamente cu Aruba Bank a organisa e evento cu diferente actividad deportivo en conexion cu e celebracion anual di Olympic Day 2022.

Pa prome biaha un total di 750 mucha a core y cana distancianan di 1-2-3 kilometer y a participa den diferente “heat” pa asina por a saca e miho tempo overall di e prome 3 luga den e categorianan di edad pa tanto mucha muhe como mucha homber.

Desde oranan trempan muchanan y hende grandi por a presenta pa asina cana y core pasando un rato agradabel.

Riba programa despues di e competencia a sigui “Meet the Top Athletes”, unda tabatin demostracion di diferente deporte.

Aruba Bank ta gradici cada mucha y mayor cu a trece nan yiu(nan) na e Olympic Day Run 2022. Tambe na IBiSA y boluntarionan cu a yuda haci e dia aki uno inolvidabel pa tur mucha por a disfruta di esaki.