Despues cu pa 2 aña largo pandemia no a permiti celebracionan publico, e aña aki si S.V. Jong San Nicolas ta cla pa celebra nan tradishonal fiesta di San Juan den e bario di Weg Fontein. Esaki ta un tradishon di mas di 30 cu e comishon organisador di S.V. Jong San Nicolas ta celebra na e forma tradishonal, y e aña aki un biaha mas nan a bin ta traha pa un par di luna caba pa asina brinda e pueblo di pariba di brug y henter Aruba un bunita celebracion di San Juan y Dera Gai.

Lo bai tin premio pa e mihor trahe den publico tanto pa mucha como tambe pa e adultonan, premio pa rancado di bandera, matador di e gai, mihor bailador di San Juan y tambe pa mihor trahe di San Juan en general. Actividad ta programa pa cuminsa pa 5or di atardi riba e tereno dilanti di e clubhuis di S.V. Jong San Nicolas cu ta e veld di voetbal net prome cu bo jega e pista di Palo Marga.

Trece e muchanan tempran y registra nan pa asina nan por participa y gana premionan bunita pa nan trahe como tambe pa e bailamento di San Juan. Animacion musical lo ta den man di tipico Tradishon Musical kendenan pa e ultimo añanan tambe a sa di coopera tur aña manteniendo bibo e fiesta cultural aki, pues San Juan ta bin San Juan ta bai pero nos ta warda e pueblo di Aruba en general pero principalmente esnan di pariba di brug bin celebra cultura cu nos na S.V. Jong San Nicolas.