ORANJESTAD – Diamars den e “regie zitting” Avestruz, ora cu Hues a propone pa cuminsa trata caso penal Avestruz dia 5 September 2022 te cu Januari 2023, tanto e abogadonan como Fiscal no tabata di acuerdo.

Hues diamars a propone pa cuminsa trata e caso dia 5 September 2022. E Hues a propone pa trata casonan separa te cu December 2022. Na Januari 2023 lo por spera sentencia.

FISCAL Y ABOGADONAN TA CONTRA

Awe mainta Fiscal a bisa cu segun proposicion di Hues, lo dura 5 luna pa tratamento. Fiscal a bisa cu Ministerio Publico no ta di acuerdo esaki. E Fiscal a bisa cu e kier pa tratamento di e caso dura menos. El a bisa cu pa bay dura asina hopi lo pone hopi presion riba Ministerio Publico. El a bisa tambe cu un di e Fiscalnan na November 2022 lo bay bek Hulanda. Ta dos Fiscal ta atendiendo e caso Avestruz. Fiscal a bisa Hues cu e ta kere cu por haci e tratamento di e caso durante 3 siman. El a bisa cu e lo bay duna na final di e tratamento un requisitorio so pa tur sospechoso.

   E abogadonan basicamente a expresa cu ta imposibel cu 5 dia despues cu Hues Comisario a scucha e ultimo testigo den caso Avestruz, ta cuminsa cu tratamento di e caso. Tin di e abogadonan a pidi pa cuminsa cu e tratamento na October 2022, mientras cu tin otronan cu a pidi pa schuif e fecha. Esaki pasobra nan kier haya suficiente tempo pa por prepara pa e caso. Hues a keda di evalua pa despues laga sa su decision.