Minister Xiomara Maduro tabata presente den Parlamento di Aruba pa asina trata cambionan importante den ley cu ta necesario pa Pais Aruba por cumpli cu e maneho di e Organisacion pa Cooperacion y Desaroyo Economico (OECD).
OECD a haci un investigacion na aña 2015 riba regimen fiscal cu por causa daño y competencia inhusto entre paisnan miembro di e organisacion. Pa por cumpli cu e maneho internacional di OECD, Pais Aruba tin cu haci cambio den e leynan pa asina evita cu Pais Aruba ta bay riba e Lista Preto. Ya na 2017 a logra elimina e patentbox di IPC y a eboli e San Nicolas regime. Na luna di april e aña aki a haci cambionan na e Vehiculo Transparente. Tabata falta pa haci cambio den ‘Landsverordening winstbelasting’, ‘Algemene Landsverordening Belasting’ y ‘Landsverordening Free Zone’, pa asina por cumpli cu e maneho internacional.
Na aña 2018 Pais Aruba a bira miembro di ‘Inclusive Framework’ di ‘Base Erosion and Profit Shifting’ di OECD den cual tin puntonan tocante documentacion y rapport cu companianan multinacional establece na Aruba mester mantene na dje. Esaki ta necesario pa evita cu e companianan aki evita pago di impuesto. Pa cumpli cu e regla aki Pais Aruba mester a ahusta e ‘Landsverordening Winstbelasting’ y e
‘Algemene Landsverordering Belasting’. E cambio ta trata di documentacion cu e companianan aki mester cumpli cune. E companianan multinacional estableci na Aruba ta custuma cu e sistema di documentacion aki caba y awor Pais Aruba a codifike den ley.
Banda di esaki e ley di ‘Landsverordening Vrije Zone’ tambe mester a wordo cambia. E regimen di ‘Free Zone’ ora ta trata servicionan cu por wordo brinda door di companianan estableci den ‘Free Zone’ mester cumpli cu e rekisitonan di e ‘Forum on Harmful Tax Practices’ pa asina evita proteccion special (‘ring-fencing’) di companianan estableci den ‘Free Zone’ compara cu esnan cu ta estableci pafor di ‘Free Zone’ . Di e manera aki Aruba ta cumpli cu su compromiso como pais miembro di OESO y ta mitiga cualkier riesgo di construccion fiscal cu ta haci daño na e base di impuesto local. Cierto servicionan por keda wordo brinda door di companianan estableci den ‘Free Zone’ den un forma limita caminda lo mester tin suficiente substancia di operacion fisico na Aruba. Pa esaki lo bin un decreto gubernamental pa stipula e servicionan. Lo exclui entre otro servicionan financiero, servicionan notarial, fiscal y di abogacia y explotacion di propiedad y/of derechonan intelectual. Parlamentarionan a aproba unanimamente e cambionan di ley. E mandatario a gradici Parlamento di Aruba pa por a cumpli pa pasa e leynan aki prome cu Fin di Aña y asina evita cu Pais Aruba ta bay riba e Lista Preto. Tambe Minister Xiomara a gradici tur e instancianan cu a traha hopi duro pa logra cu e leynan aki por wordo cambia y asina Pais Aruba por cumpli debidamente cu reglanan internacional.
