ORANJESTAD – Awe mainta Jason Mathilda (32) a presenta dilanti Hues pa e caso penal cu Ministerio Publico a cuminsa contra dje.

ACUSACION

E acusacion cu Fiscal a presenta contra Jason ta cu riba 13 December 2021, el a tira mata su tata E.Mathilda. Tambe e ta wordo acusa di posecion di arma. Por a mira den sala di Corte, un familiar di e difunto.

CASO POSPONE

Hues a bisa cu anterior e caso tabata pro forma y a dicidi pa laga traha un raport di psychiater. A palabra cu awe lo trata e caso pero ta resulta cu ainda no a nombra un psychiater. Hues a remarca cu ningun psychiater a pone su mes disponibel. Hues a bisa cu tin reunionnan ta tumando lugar pero ainda no tin nada. Esey ta nifica cu atrobe lo mester pospone e caso. Fiscal a propone pa pospone e caso pa dia 14 Juli pa 2or di merdia. E lo ta otro pro forma, pa mira con leu ta cu e raport di psychiater. Hues a bay di acuerdo cu e proposicion y a pospone e caso pa dia 14 Juli pa 2’or di merdia.