ORANJESTAD: Recientemente Minister Endy Croes a haci bishita oficial na IBISA Sportcentrum San Nicolas como tambe IBISA na Playa. IBISA ta un ‘stakeholder’ hopi importante pa Gobierno di Aruba. E mandatario di Deporte a ricibi e oportunidad di mira e programa ‘Nos Grandinan Activo’ cu ta un di e programanan cu IBISA ta ofrece na comunidad di San Nicolas. Un programa hopi bunita unda cu cuater biaha pa siman tanto na IBISA Sportcentrum como tambe na Community Pool nos grandinan ta haya oportunidad di practica deporte y socialisa. Y asina tin diferente actividad cu ta tuma luga na IBISA Sportcentrum for di mainta te atardi pe comunidad di San Nicolas. Minister Endy Croes a ricibi un recorido di e luga como tambe a tuma nota di e necesidadnan cu falta na e facilidad. E mandatrio a duna un bon noticia na unda cu a compromete cu den 2023 ora e presupuesto wordo aproba ta percura pa bin dos dak pafo caminda cu lo haci e luga hopi mas atractivo pe hobennan como tambe e grandinan cu ta haci uso di e facilidad aki durante dia. Despues di e bishita na IBISA Sportcentrum San Nicolas Minister Endy Croes a continua cu su bishita na IBISA Playa, unda a conoce e empleadonan, por a reuni cu nan y scucha nan preocupacionan. Pa finalisa Minister Endy Croes ta gradici ekipo di maneho di IBISA como tambe tur empleado pa e caluroso bon bini!