Fiscal a exigi 4 aña di prison Mama ta abusa di su mesun yiunan menor di edad

ORANJESTAD – Awe mainta Corte di Husticia a trata e caso penal cu Ministerio Publico a cuminsa contra e dama R.(58), kende ta wordo acusa cu entre Augustus 2011 te cu 2017 a abusa di su dos yiunan bou di 12 aña.

Por a compronde cu Fiscal a haya R. culpable y a exigi 4 aña di prison.

HALA ATENCION DI FAMIANAN

Na Corte tabata presente famianan di e sospechoso R. y tata y algun familiar di e muchanan. Den sala di Corte, ora e famianan a drenta, Hues a dirigi palabra na nan. El a hala nan atencion cu si durante tratamento di e caso, esun cu haci comentario, lo wordo saca for di sala. Hues a pone e famianan sinta separa di otro tambe.

MAMA TA ABUSA DI SU YIUNAN

Durante tratamento di e caso a sali na cla cu e tata R.F., a haci denuncia 7 April 2021 contra su ex señora R. di a abusa di nan dos yiunan. El a bisa cu su yiu muher a bisa cu su mama R. tabata laga nan haci actonan inmoral cu otro y tambe tabata mishi cu nan y nan mester haci’e cu e mama. Esaki ta tempo cu e muchanan tabata 4 pa 5 aña. Segun R.F. tin familiar a bisa cu e muchanan a conta cu nan mama R. tabata mishi cu nan. E persona dama J., cu tabata cuida e muchanan, a declara na KZP cu el a ripara comportacion straño di e yiu homber, kende cada biaha tata pupu y pishi den su carson na school. Tambe el a ripara cu e yiu muher tabata altera cu e mama. Ora el a hala su atencion e yiu muher a bisa cu e no sa con e mama ta trat’e. E dama a bisa cu e no tabata sa di nada te ora cu R.F. a bis’e cu e muchanan presente. Despues el a bay papia cu nan y e yiu muher y e yiu homber a conta den detayes con nan mama tabata bay cu nan den baño pa baña y ora nan tabata sunu, e tabata pone nan mishi cu otro y haci actonan inmoral. J. a bisa cu e tabata cuida e muchanan pero no tabata sa cu e mama tabata pone nan haci actonan inmoral cu otro.

Un di e muchanan a bisa cu loke su mama ta bisa cu ta su tata R.F. lo a mishi cu nan, no ta berdad. El a bisa cu ta su mama tabata mishi cu nan. El a bisa cu su mama R. a kere cu nan lo no corda kico e tabata haci cu nan. Nan a bisa cu nan ta considera J. como nan mama y no kier nada di haci cu R.

Awor e muchanan ta 14 pa 15 aña y nan bisa KZP cu nan mama a kere cu nan lo no corda kico el a haci cu nan. Nan a bisa cu ta tur dia esaki tabata tuma lugar. Nan a bisa cu e mama ta gaña cu e no a haci nada. Nan a hasta bisa cu ora nan tabata hunga pafor e mama ta bay bisa nan cu awor ta ora di “train”. Cu esey e mama kiermen pa nan bay haci actonan inmoral cu otro. Nan bisa cu si nan no haci’e nan no ta haya coy hunga. Nan ta haya cu loke nan mama a haci cu nan, no ta bon. Mientras cu Hues tabata lesa e declaracionnan, e dama J. cu ta wak pa e muchanan tabata yora.

FISCAL A EXIGI 4 AÑA DI PRISON

Fiscal a bisa Hues cu casonan di inmoralidad tin biaha ta tarda hopi promer cu sali na cla. Den e caso aki e muchanan, despues di 7 aña, a bin conta kico a pasa. Fiscal a bisa cu esaki por ta door di loyalidad pa cu nan mama of por ta cu nan tabatin miedo di conta. Door cu tempo a transcuri, na opinion di Fiscal, prueba directo no tey mas y mester busca pruebanan di sosten. Ta door di e tata di e muchanan a haci denuncia, a cuminsa e caso. Door di a tende di su dos yiunan di e abuso el a bay haci denuncia.

Fiscal a bisa Hues cu e forma con e muchanan a describi kico e mama tabata haci nan y nan mester a haci cu otro, esaki no por wordo cualifica como abuso. El a splica cu a base di ley, mester tin un forma di penetracion pa cualifica esaki como abuso.

Sinembargo aki por papia di actonan inmoral y e forma con esakinan a sosode, por cualifica esakinan como abuso. E hecho cu e muchanan, bou presion di e mama, nan mester haci actonan inmoral, por cualifica esaki mescos cu ta penetracion. Fiscal a exigi 4 aña di prison, kitando e tempo cu R. ta sera den KIA.