E di cuater exhibicion di Cas di Cultura su programa AUA Exhibits ’21-’22 ta encera e obranan di arte di CREAMOFWU, titula SOLO. Esaki tambe ta bao di curaduria di historiador di arte Ana Maria Hernandez. CREAMOFWU ta un entidad artistico local anonimo cu ta conoci door di su uzo di colornan fuerte y humor pa reflexiona y duna comentario riba temanan curu y fuerte den nos sociedad.

Den e exhibicion SOLO, CREAMOFWU ta duna e audiencia un bista den nan mundo. E ta un invitacion pa reflexiona riba e sentimentonan cu ta compaña e realidadnan di nos dia y e “bittersweetness” di e experiencia humano. E ta explora tambe temanan di individualidad, creatividad y libertad di expresion.

PA SCOL SECUNDARIO, BISHITA CU KLAS,

Cas di Cultura ta encurasha y invita scolnan secundario pa haci nan “klassenuitje” na e exhibicion aki. E estilo di CREAMOFWU ta hopi atractivo pa hoben y ta stimula creatividad na un manera moderno y vibrante. Sinembargo e topiconan di e obranan ta rekeri un conocimento basico di anatomia humano, formacion sexual y normanan di comunidad (Mens en Maatschappij, Biologie).

E exposicion SOLO lo ta habri pa publico for di diasabra 30 di april di 7:30pm pa 10:00pm. Y ta habri te cu 31 di mei, di 10am pa 4pm di dialuna pa diabierna. Diasabra cu reservacion di antemano unicamente. Cas di Cultura ta gradici Mondriaan Fonds Hulanda y Prins Bernhard Cultuurfonds Caribisch Gebied pa nan aporte cu ta haci e serie AUA Exhibits ’21-’22 posibel. Pa informacion tocante ticket pa experiencia e exposicion por yama 582-1010 of book via www.casdicultura.aw. Tin oportunidad pa haci un “tour” bou guia di Hernandez tambe of combina e exposicion cu un “tour” di e teatro.