Dialuna anochi a drenta informe di un accidente cu hende herida na Solito, mesora a dirigi tanto polis como ambulans na e sitio. Na yegada di e patruya a nota cu aki ta trata di un hoben cu a bay cruza caminda diripiente y no a paga tino cu un minivan tabata bini di nort y como e chauffeur di e minivan no por a haci nada mas a dal e victima. Polis a nota cu e victima tabata sangra pa nanishi y orea y su pulso tabata hopi abao. Na yegada di e ambulans ya no por a haci nada mas pa e victima. Mesora a pidi presencia di autoridadnan competente y un dokter. Na yegada di e dokter a constata cu e victima a fayece y a constata morto. Polis a confisca e vehiculo pa mas investigacion. Nos di awe24.com ta extende nos mas sincero palabranan di condolencia na famia di e fayecido.
———CUERPO POLICIAL ARUBA TA INFORMA———
*UN HOBEN TA PERDE SU BIDA DEN UN ACCIDENTE FATAL*
_Aruba ta conoce su di dos morto den trafico pa aña 2022_
Awe 25 april 2022 central di Polis ta dirigi patruya cu maximo urgencia pa mas o menos 9:45pm na Kamerlingh Onnestraat na altura di Eurokitchen Design Aruba pa un accidente pisa cu herido.
Na yegada Polis ta mira un Suzuki, Van, blanco numera A-54820 cu probabelmente lo a dal un hoben peaton.
Lamentabelmente dor di e sla nan ricibi personal di ambulance no por a haci nada mas pa e hoben. Pa 10:20pm Dr. Texier ta constata morto di e hoben *Gustavo Adolfo SOLARTE SANCHEZ naci na Colombia dia 4 april 2002*
E investigacion ta continua na e sitio di incidente. BFTO, specialista di trafico tin e area cera pa asina nan por haci investigacion necesario y profundo pa saca afor con e accidente aki por a pasa.
E famia di e victima ta ricibiendo sosten via di slachtofferhulp pa e momento dificilnan aki.
Cuerpo Policial Aruba ta manda palabranan di forza na e famia di e fayecido. Un mensahe na nos comunidad ta pa ban trankil riba caminda publico. Respeta nos ley y reglanan di trafico pa asina nos tur por yega cas safe.
