Pa medio di esaki Minister di Transporte ta anuncia paro temporal riba peticion pa permiso di watersports cu ta recarga “algemene watersportsvergunning”. Ta asina cu peticion pa vergunning di watersports, conforme Articulo 18 den “LB Wateren en Stranden”, ta ser pidi na minister cu ta encarga cu Transporte.

Recientemente conseho di minister a aproba un proposicion di Minister di Transporte sr. Ursell Arends, pa haci un paro “freeze” riba tur peticion pa permiso di watersports pendiente un investigacion riba e situacion actual, ambos den aspecto medio ambiental y tambe den e aspecto di siguridad.

E incidente caminda un mucha muhe den pleno flor di su hubentud ta perde su bida, ta pone den cuestion e norma y standardnan den cual e operadornan di watersports ta eherce nan actividadnan actualmente.

Tabata tin indicacion caba cu turistanan mes lo desea di tin menos actividad di watersports. Di un punto di bista ambiental, ta prefera pa te asta limita e cantidad di watersports, of regula e tipo di actividadnan mientras tambe stipula reglanan di conducta, manera velocidad maximo, cantidad di tripulante pa cada tanto pasahero etc.

Desde 2016 caba no ta otorogando mas permiso pa watersports mas den e area hotelero. Na 2018 e minister encarga cu transporte e tempo ey a wanta tur peticion pa permiso. Pero na 2019 e minister a acorda cu solamente lo aproba permisonan cu ta incera tres (3) tipo di actividadnan: sailing y boat trip, diving y snorkel, of sportfishing. Pero fuera di esaki tur otro peticion pa “algemene watersportsvergunning” a ser wanta, y ta ser estrictamente controla desde 1 di april 2022.

Minister Arends ta spera cu door di e investigacion y inventerasacion cu lo tuma lo lugar, por colecta datonan concreto – den un forma similar manera ta atendiendo cu e moratorium den transporte – pa asina tuma decisionnan concreto y structura bayendo padilanti. “Mester por garantisa siguridad pa nos hendenan, y proteccion pa nos medio ambiente na mes momento”, Minister Arends ta comenta.