Oranjestad, Dialuna siman pasa, Parlamento a cuminsa trata presupuesto pa aña 2022 na unda cu Ministernan di Gabinete Wever-Croes II a defende e presupuesto di nan ministerionan. Dialuna 4 y diamars 5 di april, a toca turno di Prome Minister Evelyn Wever-Croes y Minister Xiomara Maduro pa defende e presupuesto pa 2022 di nan ministerio. Prome Minister a remarca cu e presupuesto aki ta sumamente crucial pasobra e aña aki, despues di dos aña duro na unda cu e pandemia di Covid 19 a causa nos pais un atraso enorme den trabounan cu tawata plania, Gobierno di Aruba a decreta 2022 como Aña di Inversion y Oportunidad y Gobierno di Aruba tin un rol pa hunga den e oportunidadnan di inversion.

 

Partido AVP sosteni door di oposicion, durante e reunionnan, a presenta un mocion di desconfiansa contra Prome Minister di Aruba. Un di e motibonan cu a wordo menciona den nan mocion, ta pasobra Prome Minister lo no a haci nada pa e ‘werksternan’ di SKOA. Esaki, Prome Minister a enfatisa ta un otro mentira mas cu AVP a skirbi den nan mocion.

 

“Kier condena ami, manda mi cas pasobra ami a sali pa e ‘werksternan’ di SKOA. E unico hende cu a saca un man y hasta su nek ta ami y mi tin cu bay cas? Ta ki señal bo ta manda eynan?”, Prome Minister a enfatisa.

 

Den su disertacion pa señala tur e mentira y erornan cu e carta di mocion di desconfiansa ta contene, Prome Minister a remarca cu ta importante pa tur hende di SKOA especialmente esnan den limpiesa di SKOA, pone bon atencion ken ta para realmente na nan banda y ken ta haci uzo di e oportunidad simplemente pa oportunismo politico.

 

Prome Minister a splica cu su colega Minister Endy Croes y su persona a enfatisa bon cla, varios biaha prome y durante e reunionnan den Parlamento, cu mientras Gobierno ta den negociacion cu SKOA, Gobierno ta garantisa e pagonan mescos cu a bin ta haciendo te awor. AVP parce cu ta comprende esey masha bon pero kier keda insisti pa hunga cu inteligencia y sentimento di trahadonan den limpiesa di SKOA y cu pueblo di Aruba. Ta bon cu oposicion comprende cu Parlamento ta e constitucion mas halto di nos pais y no por haci e weganan aki. Parlamento ta algo serio y ta conta cu hendenan cu ta tuma nan trabou di parlamentario na serio tambe.

 

“No tin necesidad pa kita hende ni pa subi schoolgeld. Unabes negociacion caba y nos weita kico ta e suma envolvi, kico ta e situacion exacto, si mester nos lo bin Parlamento y nos lo tuma tur e input cu Parlamento a duna nos den e dianan aki como un sosten pa yega na un solucion pa SKOA. Esey ta hopi importante pa nos señala awe”, Prome Minister a duna di conoce.

 

Cu esaki tambe, Prome Minister a laga sin base e mocion di desconfiansa cu AVP y oposicion a firma pa mande cas, enfatisando cu esaki ta un falsedad y falta di respet na nos pueblo henter pa uza SKOA y ‘Werksternan di SKOA como un motibo pa kita e mandatario prinicipal di nos pais for di trabou. E mocion di desconfiansa a wordo desaprobra dunando tambe e confiansa na nos Prome Minister pa sigui lucha cu fe y determinacion pa nos pais y sigui lucha na bienestar di nos pais na unda su meta principal como lider di Gabinete Wever-Croes II, ta crea inversionnan cu ta brinda oportunidadnan pa cada ciudadano di nos pais.