Diaranzon mainta a drenta informe di un accidente cu hende herida riba e “Green Corridor” panort di caminda pariba di Hyatt Place, mesora a dirigi tanto polis como ambulans na e sitio. Na yegada di e patruya a bin compronde cu aki un dama chauffeur di un pick-up no a regula su velocidad ni mantene distancia y a bay dal tras di un KIA Picanto den fila su dilanti. E impacto a pone cu e pasahero di e Picanto a resulta herida. Ambulans a presenta na e sitio y a atende e dama. Mientras cu ambulans tabata atendiendo e pasahero den e ambulans e dama chauffeur di e Picanto tambe tabata keha di dolor di nek. A pidi presencia di otro ambulans pa bin atende cu e dama chauffeur tambe. Ambos a keda transporta pa hospital pa tratamento medico.