Diadomingo madruga a drenta informe di un accidente den bisindario di e hotelnan grandi. Esaki tabata net momento cu un patruya di Noord tabata pasando eybanda. Ta trata di un accidente serio toch entre un brommer y un Hyunday Accent. E motociclista cu a keda na suela tira tabata keha di hopi dolor na diferente parti di su curpa pa cual a pidi ambulance yega rapido na e sitio. Mayoria biaha accidente entre auto y brommer ta trece preocupacion pa e vulnerabilidad di e impacto di un motociclista contra un auto. E Polisnan a dicidi di cera e caminda pa evita yegada di mas mirones, mirando cu e ta un area hopi druk, pa nan por haci nan trabou cu mas cautela. Specialista di trafico tambe a acudi na e sitio p’asina haci investigacion di e accidente semi frontal aki. Persona di ambulance a cuminsa trata e hoben di e brommer mesora y despues a transporte pa hospital pa asina e haya tratamento medico mas avansa. Polis a tuma datos di e accidente y e dama di e Hyundai Accent ta conta polis cu e ta bayendo direccion ariba y na dado momento e ta wak un brommer sin luz ta bin for di pariba den su banda y pa evita el a hala mey-mey di caminda pa evita e brommer bin dal riba dje. Pero lastimamente e brommer a dal semi frontal riba e auto y daño material ta grandi.
