Diabierna atardi Corte den Prome Instancia a huramenta tres ambtenaar di Banco di Seguro Social (SVb) como deurwaarder. Na e momento aki tabatin un solo deurwaarder pero despues di e ceremonia oficial ayera tardi, e grupo a crece te na cuater.

 

E unico deurwaarder tabata Anthony Hill. Pero awor tres otro colega a sigui un curso di dos aña pa completa e educacion pa bira deurwaarder. E tres deurwaarder nobo ta Shannon Lopez-Penha, Lisa Henriquez y Rayon Lampe. Hues mr. J.M.J. (Jacques) Keltjens a conduci e ceremonia y a huramenta e deurwaardernan.

 

Elizabeth (Lisa) Henriquez tin 12 aña den servicio di SVb. Rayon Lampe tin 14 aña den servicio. E tabata e prome pa inscribi pa e curso y ta esun cu a slaag como esun di miho! Shannon Lopez-Penha tin 10 aña den servicio. Mester menciona cu a scoge e tres empleadonan aki memey di nuebe cu tabata interesa.

 

Siguridad Social ta duna un contribucion enorme na creacion di un sociedad cu mas husticia social y mantencion di e leynan ta necesario pa garantisa cu tur ta duna nan contribucion husto. Ta sigui aspira siguridad social pa tur.

 

Banco di Seguro Social (SVb) ta existi desde aña 1986 y awendia tin riba 100 empleado den servicio.