ORANJESTAD: Diabierna 18 di maart riba Dia di Himno y Bandera Minister Endy Croes a atende e ceremonia di Cuerpo Consular di Aruba. Un ceremonia cu cada aña ta keda ofreci pa Prome Minister di nos pais hunto cu departamento di relacionnan di exterior DBB, pa motibo di Pandemia ta exactamente 2 aña cu e encuentro aki no por a tuma luga mas. E relacion entre Gabinete Wever-Croes y consulnan cu ta representa e nacionalidadnan cu ta biba na Aruba, ta un relacion bon y duradero. Na unda cu Gabinete Wever Croes a expresa respet pa nan y pa gradici nan pa nan cooperacion.

Prome Minister Evelyn Wever-Croes a hiba un excelente discurso, gradiciendo e Cuerpo Consular pa tur nan trabounan cu nan ta eherce aki na Aruba, mescos cu director di DBB sr Edwin Abath a hiba palabra y tambe Consulado di Brazil sr Carlos Augusto cu ta e Presidente di Asociacion di Cuerpo Consular Aruba.

Gobierno di Aruba ta balora tur representante di exterior pa tey na Aruba durante momentonan di calamidad y cu a comproba di ta instrumental den e recuperacion economico di Aruba. E cuerpo diplomatico y consular ta e wowonan y oreanan di sector priva, banda di asisti den proteha nan ciudadanonan na Aruba, door di esfuersonan e sector priva por haya oportunidadan empresarial nobo segun nan ta manifesta na Aruba y/of den e paisnan cu ta representa.

 

Finalisando Minister Endy Croes a expresa cu despues di dos aña nos por a reuni atrobe y pasa un momento hunto y agradabel compartiendo cu diferente Consulnan riba un dia asina special manera nos dia nacional. Un merdia ameno y hopi exitoso unda a intercambia ideanan.