A reconoce tambe representantenan di A.T.A. pa e region

 

Recientemente a tuma luga un reuinion entre A.T.A. su C.E.O., Ronella Croes, C.M.O. Sanju Luidens, e equipo di A.T.A. Europa, como tambe e representantenan di Aruba pa Italia, Alemania y Reino Uni y e agencia di ‘advertising’ DEPT.

 

For di e establecimiento di A.T.A. Sui Generis (2011) te cu prome cu e pandemia (2019), Europa a mustra un crecemento. E region a crece for di un total di 80,074 bishitante na 2011 pa un total di 90,304 na 2019. E crecemento aki ta di acuerdo cu A.T.A. su strategia di diversificacion. Pa Europa e strategia di diversificacion aki ta enfoca pa crece e mercadonan di Hulanda, Italia, Reino Uni, Alemania y Belgica, cu aunke e ta chikito e ta lucrativo. Durante di e pandemia un di e mercadonan cu a sobresali ta Hulanda, Aruba su mercado primario na Europa.

 

Den transcurso di añanan, Aruba ya caba a sa di expande diferente mercado, e.o. e mercado Italiano.

Ora Italia a habri pa biahe durante di e pandemia fin di aña pasa, Aruba tabata un di e 6 paisnan na mundo pa cual nan a habri!

 

Durante di e reunionan a evalua e metanan stipula pa 2022, cu a wordo fiha na Augustus 2021, ora cu A.T.A. a entrega su presupuesto y plan pa 2022.  A analisa diferente desaroyo y nan impacto riba e metanan pa 2022. Por lo general por bisa cu Hulanda, cu ta sobresaliendo, ta indica di ta canando bon.

E meta stipula lo brinda e total di bishitante mas halto cu Hulanda a conoce ora analisa e periodo di 2011 – 2022. Italia cu tin como meta pa recupera 60% di locual a ricibi na 2019, tambe ta mustra di por alcansa esaki.

 

Pa Alemania y Inglaterra e.o., tin mas reto y A.T.A. lo ta tumando pasonan necesario pa asina atende cu e retonan presente. E mercadonan lo produci cantidadnan atractivo di bishitante, pero importante ta pa logra e metanan stipula. Mester bisa tambe si cu ta trahando riba diferente oportunidadnan cu lo por impacta 2022 y/of 2023.

 

Tambe a reconoce representantenan di A.T.A. pa e region di Europa y asina a gradici A.T.A. su socionan pa nan añanan representando Aruba; Beauveu Marketing Ltd. di Reino Uni pa 15 aña representando Aruba, Global Tourist di Italia pa 10 aña respresentando Aruba y FAME di Alemania pa 5 aña representando Aruba.