ORANJESTAD – Awe merdia 2’or e Peruano C.J.I. a presenta dilanti Hues pa e caso penal cu Ministerio Publico a cuminsa contra dje. Por a compronde cu C.J.I. ta wordo acusa di tres caso di violacion.

   Via video conference e caso a wordo atendi caminda Fiscal, Hues y abogado tabata den sala di Corte mientras cu e sospechoso ta den un oficina na KIA.

Fiscal a bisa cu e promer acusacion ta cu mas cu un biaha en todo caso un biaha riba 22 November 2021, C.J.I., como un Chaman, a viola e dama S. contra su voluntad y cu violencia. Tambe Fiscal a acusa C.J.I. di a mishi cu partinan intimo di e dama mientras cu e tabata alinea chakra di e dama.

E di dos acusacion ta cu C.J.I. a viola e dama E. den e periodo di 13 November 2019 pa 26 November 2019, mientras cu C.J.I. como Chaman tabata alinea chakra di e persona aki.

E di tres acusacion ta cu C.J.I. a viola e dama C. riba 18 November 2021, mientras cu e Chaman, tabata atende e persona aki. Tambe Fiscal a acusa C.J.I. di lo a mishi cu e parti intimo di e persona aki.

   Fiscal a bisa Hues cu e caso ta pro forma door cu ainda e procesverbaal oficial no ta cla. El a propone pa pospone e caso pa dia 13 Mei 2022. Hues a puntra mr. Illes si e ta desea di haci mas investigacion. Mr. Illes a bisa Hues cu no. Hues a dicidi cu tratamento di e caso lo ta dia 13 Mei 2022.