Diamars 15 di maart merdia, muchanan di scol basico Mon Plasir School cu yen di entusiasmo tawata wardando yegada di Prome Minister Evelyn Wever-Croes na nan scol. Den cuadro di Dia di Himno y Bandera, Prome Minister ta bishitando algun scol pa mira con e muchanan ta prepara pa nos dia nacional. Prome Minister a keda hopi impresiona di tur loke Mon Plasir School ta haciendo pa celebra e dia aki y e informacionnan cu nan ta duna na nos muchanan.

 

Na su yegada na e scol, Prome Minister a wordo ricibi pa e cabesante Juffrouw Debby Arends, demas docente y alumnonan hopi contento ta zwaai bon bini na Prome Minister cu nan banderin di Aruba.

 

Prome Minister a bishita klasnan 5 y 6 y a expresa cu esakinan tawata encuentronan hopi interesante. Prome Minsiter a conta un tiki di nos Himno y Bandera pero mas bien su deseo tawata pa scucha di e muchanan loke nan sa di nos dia nacional. Interesante y bunita tambe tawata e exposicion di articulonan di antes cu nos hendenan tawata uza. Den esaki Prome Minister ta felicita tanto e docentenan, muchanan pero tambe e mayornan cu sigur a yuda den esaki.

 

“E muchanan a haci hopi pregunta interesante. Bo ta wak cu nan ta hopi interesa den tur loke ta sosode y esey ta loke nos kier, muchanan bon informa, bon prepara pasobra ta nan tin cu tuma over mayan. Mi a keda hopi impresiona y contento di e bishita akinan tambe. Nan ta preparando pa Dia di Himno y Bandera pero principalmente nan ta prepara nos ciudadanonan di futuro, ciudadanonan cu kier participa y kier duna nan opinion y esey ta algo cu mi ta aprecia hopi”, Prome Minister a enfatisa.

 

Prome Minister ta gradici Juffrouw Debbie y tur esnan cu a haci e encuentro aki posibel y ta desea tur docente, alumno y mayornan di Mon Plasir School un dushi Dia di Himno y Bandera.