ORANJESTAD, Aruba –  7 Maart, 2022:  Aruba Hotel & Tourism Association a participa den reunion di departamanto di impuesto cu stakeholders pa ricibi informacion relaciona cu e plan di gobierno pa reforma fiscal segun landspakket di Aruba. Despues di analisa e informacion presenta na gremionan, AHATA ta expresa un reaccion preliminario riba e proposicion ricibi.

 

E reforma fiscal manera presenta lo haci Aruba hopi mas caro pa bishitante y residente, segun Presidente y CEO di AHATA Tisa LaSorte. Factornan di compensacion no ta iguala y balansa e cantidad di impuesto agrega. 

 

En bes di un reforma real cu lo crece entrada pa gobierno pa medio di un sistema mas indirecto y simpel cual ta causa cu mas hende y compania lo cumpli, e reforma presenta ta agrega un cantidad di impuesto y gasto pa esnan cu ya ta cumpliendo cu impuesto. Mas alarmante ainda ta cu no a presenta ningun informacion tocante rebaho di gasto di e aparato gubernamental. 

 

Den landspakket no ta solamente exigi pa reforma e impuestonan, pero ta exigi tambe pa gobierno baha gasto di un forma structural. E dos proyectonan mester bai man den man. Kiermen, mester baha e peso financiero di aparato gubernamental riba comunidad prome cu por determina e cantidad di entrada cu e reforma fiscal mester genera. 

 

Ademas di señala cu e proposicion di reforma presenta na nos ta aumenta e peso financiero riba comunidad y bishitante, ta bisto cu tempo ta demasiado cortico pa implementacion di un cambio grandi asina. 

 

Analisando e informacion presenta, AHATA ta nota varios punto cu no ta di acuerdo cun’e. Lo keda en espera di e siguiente reunion pa repasa gobierno su plan pa corta gasto y nos preocupacion y recomendacionnan. AHATA ta spera cu gobierno lo integra comentario y sugerencia di gremio manera priminti.