ORANJESTAD: Ayera tardi Minister Endy Croes a duna aclaracion como tambe pa cumpli cu transparencia riba e inkietud di e airconan di Biblioteca Nacional Aruba (BNA) cu ta resorta bou di Ministerio di Enseñansa. E Mandatario a informa cu e la tuma contacto cu Directora di BNA, sra. Astrid Croes como tambe cu e compania cu a gana e destaho den e caso aki pa por inverti den e airco den ‘chiller’ grandi. Nos ta papia di dos ‘water chiller unit’ di 60 ton cada un. Biblioteca Nacional Aruba tin mester di dos. Ta ekiponan hopi grandi cu tin mester pa coregi e situacion di Biblioteca Nacional Aruba. Minister Endy Croes a sigui bisa manera cu nos a drenta den gobernacion nos a percura pa cana e proceso aki. Desde fin di luna di november di aña 2021 e compania a haci e ‘order’ como cu ta trata di ekiponan grandi nos a wordo informa tambe unabes ‘order’ esakinan ta dura por lo menos cuater luna pa nan por traha esakinan y cu posiblemente den luna di april of mei venidero esakinan lo ta na Aruba.
E Mandatario di Enseñansa a sigui bisa cu mientrastanto a tuma otro pasonan cu un compania cu normalmente ta atende cu e ‘unit’ aki. E compania mester haci un trabou grandi e siman aki pues Biblioteca Nacional Aruba lo ta cera tanto diahuebs como diabierna. Nos ta premira cu e trabounan lo keda cla den dos dia y pa dialuna pa dilanti Biblioteca Nacional Aruba lo ta habri bek pa publico. Trabounan cu ta tumando luga awor aki ta pa pleister e situacion aki haci cierto cambionan di converti e sistema cu awor ta traha riba gas R22 cu ya nan no ta bende mas pa un otro tipo di gas. Nos ta pidi poco pasenshi, nos lo corigi den e dianan nos dilanti y pa dialuna Biblioteca Nacional Aruba lo ta habri normal y si tur cos ta bon e airconan lo ta funcionando bek. Probablemente den dos lunanan nos dilanti ta asina leu cu nos lo resolve e problema aki pa e proximo diescinco añanan momento cu e ‘unit’ grandi traha specialmente pa Biblioteca Nacional Aruba lo yega Aruba. Minister Endy Croes a finalisa bisando; cu nos lo percura pa publica tur informacion, paso pa paso pa asina ilustra y duna contenido tambe na parti di e trabou. Nos a drenta, nos a constata e problema, nos a tuma accion y nos a resolve problema manera nos a bin ta proclama desde inicio.
