15 aña castigo pa pedofiel

Ultimo dianan tin varios informacion incorecto ta wordo difundi riba e tema di castigo pa abuso sexual. Oponentenan ta bruha tera cu e unico meta pa sembra odio contra Prome Minister Evelyn Wever-Croes.

Den un entrevista recien, Prome Minister a enfatisa cu ya desde 2020 Gobierno a cambia e ley aki. Ta e ley cu a cambia, ta duna e fiscalnan awor e posibilidad di pidi mas castigo.

“Durante Gabinete Wever-Croes 1, dia 6 di juni 2020, nos a cambia e ley aki y a aumenta e castigo pa abuso sexual pa muchanan di 8 pa 15 aña. E cambio aki ta permiti fiscalnan pidi castigonan mas halto, te na 15 aña. Esaki ta danki na e ley cu nos gobierno a pasa dos aña pasa pa aumenta e castigo di abuso contra mucha di 8 pa 15 aña. Pues e ley aki tey caba.

Mi ta lamenta cu oponentenan ta keda bisa cu e ley no a pasa ainda, y cu nan ta hunga wega cu algo asina serio. Abuso sexual di mucha ta algo hopi hopi serio. En bes di ataca otro, ban uni forsa pa protehe nos muchanan di e abuso aki,” Prome Minister Evelyn Wever-Croes a expresa.