ORANJESTAD – Awe mainta e homber P. (35) via video conference a scucha su sentencia di 4 aña di prison pa a abusa di un mucha.

Por a compronde cu Hues ta haya cu tin suficiente prueba di sosten cu P., den su funcion como “leerplicht ambtenaar” a abusa di un mucha homber (15) riba 31 di Mei 2021. 

Awe mainta via video conference Hues a dicta e sentencia, caminda e sospechoso P. tabata den un oficina na KIA mientras cu den sala di Corte tabata Hues, Fiscal y abogado. Hues a mustra cu segun ley, mester proteha mucha contra abuso sexual di adulto. El a mustra cu e ley ta bisa cu aunke cu e mucha no resisti, e adulto ta responsabel.

   Hues a bisa cu ta un hecho cu e mucha homber di 15 aña y P.(35) tabata hunto. P. tabata den cas serca e mucha.

Hues a bisa cu tin indicacion cu P. via social media ta persigui muchanan pa abusa di nan. A haya den cellular di P. potret di mucha menor di edad y e mucha a bisa Polis cu P. ta un maniac. Tin un otro mucha cu a bisa cu P. a ofrece placa pa abusa di dje.

   Na opinion di Hues, mirando cu esakinan ta cuadra cu loke e victima a pasa aden, e ta haya cu tin suficiente prueba di sosten. Tambe Hues a mustra cu tin declaracion di e wela cu ta biba na e cas, e mucha, imagennan di video di seguridad na e cas.

   Pa cu e castigo, Hues a bisa cu actonan inmoral ta tacha intregridad di un mucha. Esaki por afecta e mucha pa hopi tempo. Hues a confirma e exigencia di Fiscal. El a condena P. na 4 aña di prison di cual 6 luna ta condicional cu un tempo di prueba di 2 aña. Esaki bou guia di Reclasering. Hues no a bisa nada riba e exigencia di Fiscal pa prohibi P. sigui haci su funcion