ORANJESTAD – Dia 26 di januari riba ‘Dia Internacional di Aduana’, Minister Xiomara Maduro a hiba un discurso di gradicimento y a comparti un desayuno hunto cu e Cuerpo di Aduana pa conmemora e ocasion special aki. Den nomber di Gobierno di Aruba, Minister Maduro a felicita y gradici tur Aduanero y tur personal administrativo riba nan dia special.
Amplia transformacion digital
Den e discurso Minister Maduro a trece dilanti cu tur aña World Customs Organization ta dedica un tema na e ’Dia Internacional di Aduana’ y e aña aki e tema ta ‘amplia e transformacion digital’. Esey ta nifica cu Cuerpo di Aduana rond mundo lo concentra pa uza y comparti mas data pa asina yuda otro mas tanto posibel. Awendia e rol di tecnologia ta masha crucial pa por mehora servicio, haci esaki mas eficiente y tambe pa locual ta hopi importante den trabou di Aduana, pa por detecta productonan illicito efectivamente.
Aña di inversion y oportunidad
Minister Maduro a indica cu Gobierno di Aruba a declara aña 2022 como aña di inversion y oportunidad. Den caso di Aduana, Gobierno ta inverti den e estudio di personal pa amplia e capacidad di e Cuerpo di Aduana. E mandatario a informa cu lo sigui inverti den recurso humano di e Cuerpo pa e personal por adkiri mas conocemento, crea mas oportunidad pa progresa y brinda un miho servicio na nos comunidad. Alabes Gobierno ta bay inverti den e di tercer fase y mantencion di Asycuda pa por optimalisa e programa digital aki.
Minister ta gradici Aduana pa e gran aporte financiero na Presupuesto 2021
Minister di Finansa ta gradici e personal completo di Aduana pa nan esfuerso y cooperacion brinda den e situacion actual di pandemia cu ainda nos ta confrontando. Minister Maduro ta gradici Aduana pa e gran aporte financiero na Presupuesto 2021 di Pais Aruba. ‘Danki na boso esfuerso y boso dedicacion, Pais Aruba a ricibi mas fondo cu tabata presupuesta na invoerrechten y accijnzen den aña 2021. Esaki ta un aporte importante na e finansa y na bienestar general di Pais Aruba. Masha danki pa boso dedicacion.’
