Dialuna mainta a tuma luga un reunion entre e Prome Ministernan di Reino Hulandes hunto cu Secretario General di Nacionnan Uni, señor António Guterres. Presente durante e reunion aki tabata Prome Minister Evelyn Wever-Croes, Prome Minister di Hulanda, Mark Rutte, Prome Minister di Corsou, Gilmar Pisas y Prome Minister di Sint Maarten, Silveria Jacobs. 

E reunion aki ta ser organisa un biaha pa aña na unda ta toca temanan di importancia pa Reino completo. Temanan cu a ser toca e mainta aki ta entre otro; e metananan cu Nacionnan Uni tin di Desaroyo Sostenibel pa aña 2030; e situacion tenso cu tin actualmente na e frontera entre Russia y Ukraine; clima y e necesidadnan pa traha plannan hunto pa minimisa e impacto riba cambio climatico; e situacion na Venezuela y Covid 19.

Un di e temanan importante cu a toca durante e reunion ta e situacion di Venezuela cu tin un efecto grandi riba Aruba. E situacion interno na Venezuela ta poniendo hopi presion riba Aruba y Corsou pa loke ta trata migracion for di Venezuela. Esaki debi cu Aruba ta un isla chikito cu capacidad limita. Pa e motibo aki ta pidi Nacionnan Uni pa duna mas sosten na un solucion pa cu e crisis humanitario, economico y politico aki.

Tambe a pidi atencion di Nacionnan Uni riba e efectonan cu e cambio climatico tin riba e islanan. E ta necesario pa traha hunto riba plannan y pa cada pais adapta nan sistema pa tin menos impacto riba cambio climatico. Door di e polucion den paisnan grandi, e clima den e region aki ta cambiando poco poco ocasionando temperaturanan mas halto, orkaan y catastrofenan natural mas severo. E situacion aki ta afectando grandemente e islananan den Caribe siendo cu no ta e islananan aki ta causando e polucionnan aki.

Tambe a toca e tema di Covid 19 y con e pandemia aki a afecta e islanan specialmente Aruba pa loke ta trata turismo y biahamento. Na e momento aki, Aruba ta participando na un “multi-dimensional vulnerability index” pa trece un miho balans, no solamente den GDP cu ta bira e metodo pa guia y midi e desaroyo di un pais pero na unda lo bay mira mas dimensionnan den esaki.

A pidi mas atencion pa loke ta trata e tema di debenan y sosten di likides cu ta necesario den cuadro di Covid 19 mirando cu esaki ta di gran importancia y ta rekeri e debido atencion ya cu paisnan chikito manera Aruba, cu ta un Small Island Development State, lo no sali di e pandemia financiero aki nunca.

Finalmente e islanan a informa cu Reino lo presenta su “Voluntary National Review”, cu ta e relato voluntario nacional con cada pais den Reino ta cumpliendo cu e “Sustainable Development Goals” durante un foro politico cu lo wordo presenta den e proximo lunanan cu e proposito pa presenta tur exitonan cu tin, e retonan cu a encontra sperando cu esaki por yuda otro paisnan tambe.

Prome Minister Evelyn Wever-Croes duna di conoce cu e reunion tabata uno fructifero caminda cu Secretario General tabata tin oido pa e peticionnan di e paisnan, especialmente di e islanan cu ta wordo azota pa un crisis tras di otro. Aruba, Corsou y Sint Maarten a ricibi palabranan di elogio pa con nan a maneha un crisis tras di otro y tin e compromiso di sosten di Nacionnan Uni.