Den 2021 a logra paga 34.6 miyon florin na restitucion
Oranjestad – Minister di Finansa ta informa cu a pesar di e situacion financiero, Gobierno di Aruba ta keda inverti den departamentonan vital manera entre otro Departamento di Impuesto (DIMP) pa asina sigui ekipa, digitalisa y automatisa procesonan compleho di impuesto pa asina e Departamento por brinda un miho servicio na nos comunidad. Durante e ultimo añanan por a tuma nota di diferente cambio cu a tuma luga pa modernisa e servicio cu tecnologia moderno manera e portal “Bo Impuesto” (BOI). E proyecto di digitalisacion di DIMP tambe a sigui avansa y e trabounan di yena manualmente e datonan di loonbelasting, BBO y otro impuestonan mensual pa gran parti a wordo automatisa y ta na agrado di e usuario.
DIMP a cumpli na tempo cu palabracionan den Landspakket
Despues di trabounan intensivo durante seis aña, cu a dura di aña 2015 pa 2021, e retrasonan den e trabounan di hinca datonan di e formulario di inkomstenbelasting y winstbelasting den e sistema, a wordo pone al dia. Cu e resultado aki di e proyecto di Data Entry, Departamento di Impuesto a logra pa verifica e declaracionan di inkomstenbelasting y winstbelasting di e añanan 2010 te cu aña 2019. Un logro hopi importante pa e Departamento cu danki na e compromiso y e cooperacion di e empleadonan cu a traha duro pa hinca informacion di mas cu 300.000 declaracion, un pa un, den e sistema. Cu e proyecto di digitalisacion ta cumpli cu e palabracion haci den puntonan C3 y C4 den e Landspakket, e uitvoeringsrapportage, e plan di accion y e ‘mijlpalenplanning’.
Den 2021 a paga 34.6 miyon florin na restitucion
DIMP a procesa den aña 2021 un total di 34.6 miyon florin na restitucion na contribuyentenan pa e añanan 2016, 2017, 2018 y 2019. Ta resta un cantidad chikito di formularionan di inkomstenbelasting 2019 pa procesa pa asina por cuminsa procesa e formularionan di aña 2020.
Mehoracion di calidad di servicio
E esfuerso y logro aki ta forma parti di e vision di Gobierno di Aruba, pa fortalece y duna prioridad na Departamentonan vital, automatisa y simplifica e sistema di impuesto pa asina tin un reparticion husto di e peso di impuesto. Esaki ta encera modernisa, digitalisa y automatisa procesonan y leynan existente pa asina mehora e calidad di servicio na e contribuyente y ta refleha riba e eficiencia di e Departamento.
Gradicimento
Minister Xiomara Maduro ta gradici staff y personal DIMP pa nan tremendo dedicacion, esfuerso y determinacion pa asina aki por a logra conclui cu e proyecto grandi aki. Danki na e esfuerso aki awor no mester warda largo mas pa ricibi restitucion y alabes ta yuda baha gasto di gobernacion.
