Diahuebs, 27 di januari, Honduras ta conoce un Presidente Nobo, Sra. Xiomara Castro, un Presidente femenino. Prome Minister Evelyn Wever-Croes lo representa Reino Hulandes na e acto di toma di posicion cu lo tuma luga diahuebs 7or di mainta. Varios otro mandatario mundial lo ta presente den cua varios lider femenino den region.

Haciendo uzo di e oportunidad cu varios lider femenino ta presente na Honduras pa e ocacion special aki, lo tuma lugar un encuentro pa trata e desaroyo di hende muhe tanto den politica como den otro funcionnan. Tin hopi interes cu a wordo expresa pa sa kico Aruba ta haci pa stimula mas desaroyo di hende muhe den liderazgo y kico ta haci pa sigura e exito di hende muhe den posicionnan di liderazgo.

“A yega na nan atencion cu na Aruba hopi posicion di liderazgo ta wordo ocupa pa hende muhe cua sigur tawata un bon motibo pa nos organisa e encuentro aki”, Prome Minister a enfatisa.

Presente na e eventonan lo ta tambe Vice Presidente di Merca, Sra. Kamala Harris, hunto tambe cu otro mandatarionan den region. Prome Minister a expresa cu ta un gran honor pa representa Aruba y Reino Hulandes pa estrecha lasonan como tambe mira kico ta e oportunidadnan cu por explora.

“Ta un honor pa mi tambe pa presencia pa prome biaha toma di posicion di un Presidente Femenino den un otro pais. Como hende muhe, nos mester apoya otro hende muhe, yuda y sostene otro, pa asina mas hende muhe por ta exitoso”, Prome Minister a expresa.