Desde inicio di Gabinete Wever – Croes II e aña aki, Prome Minister Evelyn Wever – Croes encarga cu Ministerio di Infrastructura a continua cu diferente trabou cu tabata pendiente desde Gabinete Wever – Croes I.
Infrastructura y Ordenansa Teritorial
Un di e trabounan aki ta encera servicio na cliente. Pa mehora e servicio na cliente a concentra riba digitalisacion, entre otro pa pago na Kadaster cu e ‘point of sale system’ (POS), y digitalisacion di e proceso di aplica pa tereno na DIP. Tambe a prepara e plan pa elimina tur atraso na DIP di e mas di 15 mil peticionnan pa tereno erfpacht residencial, erfpacht comerial, tereno den huur pa plantacion of cambio di destinacion. E plan aki lo wordo ehecuta den prome mita di 2022, y despues di esaki, e tempo di espera pa peticionnan na DIP lo ta limita na 3 pa 6 luna maximo.
Pa garantisa procesonan integro y depolitisacion di procesonan di otorgamento di tereno, a prolonga e mandato otorga door di e Minister di Infrastructura na director di DIP; di e forma aki ta percura cu no tin ningun influencia politico den e procesonan di DIP, mientras e investigacionnan di influencia politico pa tur e ex Ministernan di Infrastructura desde 2009 te cu 2020, ta wordo finalisa.
Gobierno ta orguyoso di a pone Aruba riba mapa di desaroyo duradero por medio di introduccion di ROP /ROPV na september 2021, pa un desaroyo ordena, teniendo cuenta cu medio ambiente. Tambe gobierno a introduci e asina ‘build with nature’ door introduccion di un aanlegvergunning.
Banda di e proyectonan ya menciona, no por falta a e trabounan realisa na rotonde na Palm Beach. E proceso pa construccion di e rotonde a wordo finalisa y fondonan a wordo aloca pa construccion cuminsa den e prome kwartaal di 2022; mientrastanto a bin cu e solucion temporal por medio di ‘drempel’, cu a resulta den reduccion di e accidentenan.
Pa locual ta e necesidad/demanda grandi cu tin den comunidad pa vivienda y e scarsedad di tereno disponibel actualmente, DIP hunto cu un partner priva, a desaroya e proyecto ‘Caribbean Town’, cu ta un proyecto cu lo brinda 330 vivienda na esnan cu a aplica pa tereno na DIP den e ultimo 8 añanan y no a haya tereno. Cu esaki Gobierno ta cumpli cu su mision pa yuda cu tereno y/of cas pagabel pa pueblo, y cu e vision a traves di un proyecto piloto ‘vertical home’/ casnan vertical.
Pa locual ta edificionan di gobierno cu e maneho tambe ta resorta bou di e Minsterio di Infrastructura, dia 20 di october Gobierno a firma MoU cu Bohama pa construccion di un edificio nobo pa Aduana, strategicamente na Barcadera, mientras ta desaroya e edificio bieu di Aduana den un compleho di vivienda di luho, y asina trece bida den e area crucial aki pa desaroyo di Oranjestad.
Pa locual ta e situacion di UTV/ATV, a tuma e decision strategico pa regula y limita e cantidad di vehiculo UTV/ATV riba nos careteranan publico, y den areanan di naturalesa; mientrastanto a introduci un moratorio riba e permisonan di UTV/ATV.
Un otro punto cu tin atencion di Gobierno ta Parkietenbos. Pa alivia e molester di desperdicio na dump na Parkietenbos, e incinerator, bou maneho di DOW, a drenta funccion dia 1 november 2021 despues di a cumpli cu tur rekisito, teniendo cuenta cu veredictonan di Corte di Aruba.
Por ultimo, Proyecto Aruba Outdoor Amenities a logra inicia cu dos proyecto, restauracion di Ayo Rock Formation, y revitalisacion di nos beachnan.
Esakinan ta algun di e proyectonan cu Gobierno di Aruba a realisa den poco tempo di Gobernacion, y di mes forma lo continua trahando na bienestar di henter comunidad.
