Tabata algo pasa di 9:00pm cu un homber a yega staciona su auto dilanti U Convenience Store situa den Caya Ritmo, net dilanti CITGO Sasaki. El a baha cumpra algun cos y ora a habri su porta di auto pa drenta, un Toyota Tercel color blanco a alcans’e y a bay lag’e atras cu hopi dolor na su pia.
Asina mes e homber a subi su auto y a bay Chines Club situa den e mesun caya ey, unda el a organisa un fiesta pa e anochi ey. Pero ora el a baha eynan su pia a nenga y a bin ripara cu el a hincha masha. Ey a pidi presencia di Polis y Ambulance pa pone nan mes na altura di e susedido.
Paramediconan riba Ambulance a brinda asistencia na e victima pero el a insisti cu e no kier bay for di su fiesta awo. El a duna Polis discripcion di e auto. El a sali di CITGO Sasaki, pues facilmente por repasa e camara di siguridad pa check e number di e auto.
