Hunto pa un economia mas fuerte y un autonomia aun mas fuerte.
1 januari 2022 ta marca 36 aña cu Aruba a bira un pais autonomo den Reino. 36 aña den cual nos a forma nos mes y consolida nos mes como un pais cu un democracia fuerte y un economia stabil den mundo. Un pais di cual su exito ta e determinacion y e cordialidad di su ciudadanonan. Un pais cu asina a gana respet y admiracion di hopi otro pais den mundo. Y cu su lucha pa su libertad a inspira otro paisnan den region pa lucha pa nan libertad tambe.
Den 36 aña nos a logra hopi como pais, y maske cu no ta tur ora cosnan a cana manera cu mester ta, como un pais responsabel, Aruba y su ciudadanonan mes tabata sa di coregi e rumbo.
Prome Minister di nos pais, señora Evelyn Wever-Croes na ocacion di 36 aña di Status Aparte a expresa:
“Awe, 36 aña despues, nos tur ta di acuerdo cu e Status Aparte cu nos pais a logra dia 1 di januari 1986, cu tabata un lucha arduo cu algun politico, manera Juancho Irausquin y Shon A Eman a cuminsa, pero na caminda a lag’e, y cu nos gran estadista señor Betico Croes cu sudor y sanger, a logra realisa pa nos. E tabata e arkitecto y constructor di e pais, e cas, cu awe nos ta biba aden, el a entrega nos e ‘yabi’ di e cas cu e mes no a logra biba den dje. Y cu danki na e vision y curashi di señor Nel Oduber, cu a garantisa continuidad di e Status Aparte momento cu a scrap e fecha di independencia.
Awe 36 aña despues, nos ta mira cu e pandemia Covid-19 a kibra nos pais, pero riba propio forsa, asisti financieramente pa Hulanda, nos a cuminsa recupera bek.
Aruba ta den recuperacion, y mi ta invita bo pa nos uni, cu e mesun determinacion y amor patrio cu esun di añanan ‘70 y ‘80, y lucha un biaha mas pa recupera di e golpi aki, cu un economia mas fuerte y un autonomia aun mas fuerte. Esey ta mi compromiso, y mi ta invita bo pa hunto nos haci’e, hunto pa Aruba. Pabien Aruba!”.
