ORANJESTAD, Aruba – 20 di december 2021: Aruba Marriott Resort & Stellaris Casino ta contento di por anuncia cu na augustus aña pasa a cumpli 25 aña na Aruba pero door di pandemia no por a celebr’e. E aña aki atrobe tin reto cu a impedi un celebracion na nan gusto. Pero e hotel no kier laga e hecho aki pasa sin mas, specialmente pasobra desde cu nan a habri 26 aña pasa, ainda tin 113 trahado den servicio keto bay!
Esther Gomes awendia ta supervisor na Watapana Café. E ta masha gradici na Marriott cu a habri porta p’e y awe tin 26 aña trahando cu nan. E ta hopi orguyoso di ta a forma un carera den e hotel prestigioso aki. E ta contento cu su coleganan, cu su trabou y a dedica hopi tempo eynan. E ta considera Marriott su di dos cas.
Parti di e secreto pa por traha tanto aña asina ta esfuerso, dedicacion, tempo y sin lubida e servicio excepcional cu ta duna na tur bishitante. Antes e tabata traha como ayudante di coki na Pavilian, a promove pa coki y despues hasta como e coki principal. Di eynan el a bira supervisor y awendia ta traha na Watapana Restaurant den e hotel mes.
E ta contento y orguyoso di su coleganan cu ta traha cu ne den team. Nan ta yuda otro p’e trabou por sali y asina por brinda servicio n’e asociadonan pa nan por ta hopi contento cu e cuminda y e servicio cu ta ofrece nan. Esther Gomes a yega leu door di su amor y dedicacion na trabou. El a logra comparti su tempo pa famia na cas y tambe pa su trabou.
Bernadina de Jesus tambe tin 26 aña trahando na Marriott. E ta considera su coleganan como su famia, nan a yud’e manda su yiunan scol, mientras e mes a siña hopi eyden. El a cuminsa como un camarera di housekeeping y despues el a subi como supervisor y a sigui pa casino. Aki el a siña hopi cos, pasobra Marriott ta brinda oportunidad pa crece den e compania.
Aunke e tin su edad, ainda e ta traha cu Marriott y ta recomenda tur otro hende pa tambe bin traha eynan, unda nan por competi y traha hunto. Esey ta su deseo di curason y e ta stima Marriott, pasobra Marriott a dun’e hopi. Den bon y malo…ainda e ta cu Marriott.
Anikacia Castro, empleado di housekeeping, tambe a celebra 26 aña trahando na Marriott. Esey ta nifica hopi experencia y conocemento. El a sigui varios curso pa por a avansa den su trabou y combina cu e amor cu e tin pa su trabou, a hib’e na horizontenan nobo. “Pasobra si no tin amor pa trabou, hamas lo a logra yega 26 aña”, asina el a expresa. “Si bo tin un meta pa bay dilanti, bo ta bay dilanti. Si bo cuminsa wak na banda, nunca bo ta yega unda bo kier”, el a expresa.
Castro ta di pensamento cu esey a pone cu el a yega 26 aña trahando ya cu el a dedica mas tempo na su trabou cu cas, pasobra el a pasa mas tempo na pia di trabou. El a haci esey door di tin amor pa trabou. Si tin amor pa algo, tin di lucha p’e.
Chan Esita ta assistent di housekeeper na Marriott Surfclub. E ta entre e asociadonan cu a habri e hotel na 1995 y cu t’ey keto bay. E ta orguyoso di por ta trahando 26 aña eynan. E nunca a spera esey. E trabou aki ta pon’e atende hopi huesped. E impacto cu esaki tin riba dje, el a pasa pa su yiu y a bis’e: “si bo ta bay traha cu integridad, siña tur loke tin di siña, manera m’a haci na Marriott. Asina ey bo lo yega manera mi a yega den mi carera”. Loke e ta bisa su yiu ta pa ta amabel y cu integridad ta importante. Tambe p’e siña con pa atende cu hende, pasobra esey ta yuda.
Empleadonan fiel na Aruba
E compania ta considera e grupo di 113 empleado, cu a habri e hotel dia 31 di augustus 1995 y cu ta trahando te awe, como nan “charter team”. Na mundo, ora revisa tur e propiedadnan di Marriott, sin duda cu Aruba tin un di e nivelnan di mas halto di trahadonan fiel cu a keda cu e compania desde su apertura. No ta un desaroyo normal, pues e ta bisa algo di e forma con e compania ta trata su empleadonan, e compromiso cu e tin cu nan pa nan bienestar, progreso, educacion y crecemento den e compania. Charter Team di un compania ta e prome ekipo, cu normalmente ta esun cu ta habri e caminda, explora e miho forma di traha, crea protocolnan interno cu despues di 25 aña ainda ta vigente y ta percura pa un servicio sin igual, cu ok ta sigui atrae huesped pa e hotel.
Tocante Marriott Aruba
Aruba Marriott Resort & Stellaris Casino a habri dia 31 di augustus 1995 cu 411 camber y despues a añadi 3 camber mas na aña 2018. Na aña 1999 a habri Ocean Club cu 311 camber y na aña 2004 a habri Surf Club cu 900 camber. En total, e famia di Aruba Marriott & Stellaris Casino ta consisti di mas o menos 1200 empleado den servicio directo. E compleho di Aruba Marriott & Stellaris Casino ta esun di mas grandi den henter Caribe, tanto den cantidad di camber como den cantidad di empleado.
