UPP ta satisfecho te awor aki cu e rumbo cu e reunion a tuma. UPP sinembargo ta condena e forma cu a trata na bulldoze e cambio di ley di Serlimar y comportacion di Presidente di Parlamento cu parce kier coopera cu e minister pa esaki bay mas liher posibel.

Pa casi un aña UPP a bin ta vocifera nos inkietudnan encuanto e cambionan dudoso tumando lugar na Serlimar y p’esey e tabata un grato sorpresa di experencia con mayoria di e puntonan cu nos a pidi atencion p’e a haya atencion y cu cambionan ta wordo premira. 

Como partido nos ta satisfecho cu nos trabou extra-parlamentario a crea e ambiente necesario cu na final a percura pa varios instancia y partidonan aki na Aruba a braza e  argumentonan al caso y confiabel di UPP. Pa nos partido e meta final ta pa e minister realisa cu no ta SU kier ta conta, NO ta su interes ta conta, sino e bienestar y e interes di nos pais. E lucha di UPP no a bay sin consecuencia personal. Hopi fanaticonan ciego, incluso familiarnan, a haya ta bon pa cuestiona y critica nos di un forma baho y infunda. Nos ta di opinion sinembargo cu e interes general a vence interes partidista y personal. Nos a logra nos meta parcialmente. Nos ta bisa parcialmente, mirando cu nos no por confia tampoco, ya cu e Scorpion, cu hopi a cay p’e caba, ta keda peligroso.

Asina nos por menciona cu pa e Serli-bank lo bin un raportahe cada 6 luna pa mira kico a ser ricibi y con e placa ta wordo maneha. Nos ta spera aki tambe cu lo delinea un cuadro pakico e fondonan specificamente lo ta destina y no bira un otro fuente pa pone mas hende na trabou, ni pa malgasta den propaganda politico pa alsa e minister. Y mester bin un sanccion ora cu e director no atene su mes na e obligacion legal aki.

Den su afan pa bulldoze e cambio di ley e minister a indica cu e cambio di ley no tin nada di haber cu compra di un incenirator. Aki ela ricibi apoyo total di Minister Presidente cu den un carta fecha 2 di oktober a laga sa na e habitantenan di Parkietenbos cu e cambio di ley no tin nada di haber cu compra di un incinerator. Otmar Oduber a haye obliga pa durante e debate den parlamento pa admiti cu e incinerator ta parti di e ley. Su intencion pues pa pasa e incinerator SIN discusion no a logra, pasobra ela wordo gara “con la mano en la masa”! 

Aki nos palabra di elogio pa e forma con parlamentario Tevreden a sa di duna un splicacion alcaso riba e parti aki, de facto mustrando asina ey cu den e disputa entre UPP y e Minister, nos partido tabata tin razon. Danki Dios cu sano huicio a prevalece ya cu nos a comprende cu e relacion entre e ley y compra di un incinerator lo wordo saca for di e ley, manera poni awor aki den concepto di ley den articulo 1c. 

Un otro ponencia di UPP cu NO ta e stakeholders y esnan cu a reacciona den e RFI a conseha pa bay direccion di un W2E via mass inceniration, manera e minister a keda persisiti desde maart 2018 cu nos a cuminsa cuestiona e minister. UPP tambe a haya razon for di e propio Otmar Oduber ora cu ela declara cu e incinerator ta parti di e acuerdo di gobernacion di e coalicion POREDmep. Su declaracion lo ta un mensahe directo na su partnernan di coalicion riba e dicho “een man een man, een woord een woord”.

For di un comienso UPP a enfatisa cu henter e plan di e minister ta basa riba “natte vingerwerk” y e prueba a wordo duna for di oranan di mainta caba. Diripente a cambia e formula di  reparticion di costonan pa loke ta trata recohemente y maneho di desperdicio esta e 7,50 florin pa recohemento y 17,50 florin pa maneho a bira 15,00 florin pa Serlimar recohe sushi y 10 florin cu tur hende mester paga pa maneho di sushi dor di Serlimar. Nos ta kere cu p.e. e tenemento di nos cayanan limpi y bunita, ta un tarea di gobierno cu por wordo eherci dor di Serlimar manera e ley ta permiti, pero cu ta gobierno mester paga pa e servicio aki, mescos cu e lo a hacie directamente na tur e contratistanan canto di caminda. Y esaki lo mester bin for di impuesto y saca for di “algemene middelen”.

Awor cu e reunion lo sigui te dia 15 di oktober proximo, lo ta bon pa partidonan sinta hunto y calcula un bon reparticion cu ta corecto y husto y realmente bon substancia y argumenta pa asina no pone mas presion riba e consumidor. Den e dianan aki nos lo bin cu otro aspectonan di e ley, manera por ehempel e cambio den aspecto di “verwerking” pa “beheer”. Nos ta kere cu Serlimar mester tin e aspecto di “verwerking” como compania ya cu esey hustamente ta garantisa futuro di Serlimar y e trabou di e empleadonan. Si mayan Serlimar resulta den simplemente un “doorvoer” di desperdicio pa manda pa un “incinerator” manera ta e plan di e minister, pregunta ta si futuro di Serlimar ta garantisa of no!

En todo caso nos ta satisfecho cu e rumbo di e reunion, pero nos ta keda riba nos “qui vive”, pasobra e Scorpion ta keda peligroso.

Aruba, 3 oktober 2019

Booshi Wever

Lider UPP

Brazil 163